Ўзбекистонда интеллектуал мулк объектларини давлат рўйхатидан ўтказиш жараёни соддалаштирилди. 8 августда қабул қилинган қонун билан айрим қонун ҳужжатларига тегишли ўзгартириш ва қўшимчалар киритилди.
Қонун ҳужжатларига киритилган ўзгартиришларга кўра, саноат мулки объекти рўйхатга олинганда патент талабнома берувчига автоматик тарзда электрон тизим орқали юборилиши белгиланди. Илгари Саноат мулки объектига патент бериш объект рўйхатга олинганлиги ҳақидаги маълумотлар расмий ахборотномада эълон қилинган санадан эътиборан 10 кун ўтганидан кейин амалга оширилиши белгиланган эди.
Шунингдек, қонун ҳужжатларига киритилган ўзгартириш ва қўшимчаларга кўра, интеллектуал мулк объектларига бўлган ҳуқуқларни бузганлик учун жавобгарлик кучайтирилиши белгиланди.
Жумладан, Жиноят кодексининг 149-моддаси эндиликда муаллифнинг шахсий номулкий ҳуқуқларини бузиш деб номланади (илгари муаллифлик ёки ихтирочилик ҳуқуқларини бузиш деб номланган). Унга кўра, асарга, ихтирога, фойдали моделга, саноат намунасига, селексия ютуғига ва интеграл микросхема топологиясига нисбатан муаллифликни ўзгартириб олиш, ҳаммуаллифликка мажбурлаш, шунингдек, ушбу интеллектуал мулк объектлари тўғрисидаги маълумотларни улар расман эълон қилингунга қадар муаллиф розилигисиз ошкор этиш БҲМнинг 50 бараваридан 75 бараваригача (20,6 миллион сўмдан 30,9 миллион сўмгача) миқдорда жарима ёки 5 йилгача муайян ҳуқуқдан маҳрум қилиш ёхуд 360 соатгача мажбурий жамоат ишлари ёки 2 йилгача озодликни чеклаш билан жазоланади.
Биринчи марта жиноят содир этган шахс, агар у жиноят аниқланган кундан бошлаб 30 кун ичида муаллифнинг шахсий номулкий ҳуқуқларини бузиш оқибатларини бартараф этган ва етказилган моддий зарарнинг ўрнини қоплаган бўлса, жавобгарликдан озод этилади.
Қонун 9 августдан кучга кирган. Жиноят кодексидаги юқоридаги ўзгариш эса қонун эълон қилинганидан 3 ой ўтгач амалга киритилади. Ҳозирги тартибга кўра, муаллифлик ёки ихтирочилик ҳуқуқларини бузганлик учун жарима БҲМнинг 25 бараваридан бошланади.
Изоҳ (0)