АҚШ президенти Дональд Трамп 11 август куни каннабис (марихуана)ни унча хавфли бўлмаган дори воситаси сифатида қайта таснифлашни кўриб чиқаётганини маълум қилди. Бу ҳақда Al Jazeera хабар берди.
Трамп Оқ уйда журналистлар билан мулоқот чоғида тегишли масала бўйича қарорни яқин ҳафталарда қабул қилишини билдирган.
“Умид қиламанки, бу тўғри қарор бўлади. Бу жуда мураккаб мавзу”, деди АҚШ раҳбари.
Президент тиббий мақсадларда ишлатиладиган каннабис ҳақида “яхши гаплар” эшитганини, бироқ унинг бошқа жиҳатлари борасида салбий фикрлар ҳам мавжудлигини айтган.
“Баъзилар уни ёқтиради, баъзиларга бутунлай ёқмайди. Чунки улар каннабис болаларга ҳам, катталарга ҳам бирдек зарарли деб ҳисоблайди”, деди президент.
Трампнинг ушбу баёнотидан сўнг каннабис ишлаб чиқарувчи компаниялар акциялари кескин кўтарилган. Нью Йоркдаги Тилрай Брандс акциялари қарийб 42 фоизга ошган, Канаданинг Village Farms International ва Canopy Growth Corp компаниялари эса мос равишда 34 ва 26 фоиз ўсишни қайд этган. The Wall Street Journal хабарига кўра, Трамп яқинда ўтказилган хайрия кечасида ҳам каннабисни қайта таснифлаш режалари борлигини билдирганди.
Ҳозирда АҚШнинг 24 та штатида каннабисни рекреацион мақсадларда ишлатиш тўлиқ қонуний бўлса-да, ундан фойдаланиш ва сақлаш федерал жиҳатдан ноқонуний ҳисобланади. Каннабис ҳозирда гиёҳвандликка қарши курашиш бошқармаси рўйхатига киритилган бўлиб, у героин, ЛСД ва экстази билан бир тоифада туради. Бу турдаги моддаларга “тиббий фойдаланиш учун тасдиқланмаган воситалар сифатида қаралади.
Собиқ президент Жо Байден каннабисни “жисмоний ва психологик қарамлик хавфи ўртача ёки паст” воситалар қаторига киритишни таклиф қилган эди. Бироқ бу ташаббус унинг президентлик муддати якунигача амалга ошмай қолиб кетган.
Каннабис — наша оиласига мансуб ўсимлик бўлиб, унинг турли қисмларидан турли мақсадларда фойдаланилади. Унинг асосий фаол моддаси тетраҳидроканнабинол (THC) бўлиб, у психотроп таъсирга эга.
Марихуана — каннабис ўсимлигининг қуритилган барги, гули ва поясидан тайёрланадиган психотроп восита. Уни кўпинча чекиш ёки ҳидлаш орқали истеъмол қилишади.
Ушбу дори воситаларидан тиббиётда оғриқни камайтириш, кўнгил айнишини бартараф этиш, айрим неврологик касалликларда симптомларни енгиллаштириш мақсадида фойдаланилади.
Изоҳ (0)