Санкт-Петербург губернатори Александр Беглов мигрантларга курерлик фаолияти билан шуғулланишни тақиқлади. Сиёсатчи тегишли қарорни имзолади.
Маълум қилинишича, қарор Россия фуқароларини ишга жалб қилишга қаратилган.
Қарор яширин бандликка қарши курашиш, курерлик соҳасида хизматлар сифати ва хавфсизлигини ошириш, шунингдек, Россия фуқароларига, биринчи навбатда ёшлар ва талабалар учун янги иш ўринларини яратишга қаратилган, дея таъкидлади ҳокимият вакиллари.
Таъкидланишича, бу чора етказиб бериш бозорига таъсир кўрсатмайди. Сабаби соҳадаги мигрантлар улуши юқори эмас. Иш берувчиларга “кадрлар сиёсатини мослаштиришлари” учун уч ойлик муҳлат берилган.
Бунгача Петербургда 2025 йил охиригача мигрантларнинг таксичилик қилиши тақиқланганди. Чеклов такси хизматлари сифати ва хавфсизлигини оширишга, “Россия фуқароларини иш билан таъминлаш учун қўшимча имкониятлар” яратишга қаратилган.
Шундай чекловлар бошқа ҳудудларда ҳам жорий этилмоқда. Масалан, Қримда муҳожирлар фаолиятига оид қатъий тақиқлар киритилди. Минтақа раҳбари Сергей Аксеновнинг айтишича, хорижликларга фақат иккита соҳада: қурилиш ва туризмда ишлашга рухсат берилган. Фаолиятнинг 80 дан ортиқ соҳаси тақиқ остига олинган.
2025 йил январь ойида Россиянинг 49 та минтақасида (шу жумладан, аннексия қилинган Украина ҳудудлари) мигрантларнинг ишлашига турли даражадаги чекловлар жорий этилганди. Амалда тақиқ объектлари асосан Ўзбекистон ва Тожикистондан келган ишчилар бўлган, деб ёзган эди “Верстка” нашри.
Изоҳ (0)