Ўзбек кино оламидаги бир-бирига ўхшамас роллари билан машҳур бўлган актриса Асал Шодиева 6 апрель куни 31 ёшни қарши олди. Шу муносабат билан қуйида актриса иштирокидаги энг эсда қоларли фильмлар ҳақида маълумот берилади.
Актриса, хонанда Асал Шодиева 1992 йилнинг 6 апрель санасида Тошкент шаҳрида таваллуд топган. Асал санъатга кириб келган илк йилларида “Ўзбекистоним” номли таронани ижро этган. У Успенский номидаги мусиқага ихтисослаштирилган мактабда таҳсил олган.
Кейинчалик Асал Шодиева актрисалик соҳасида ўзини синаб кўрди ва айнан шу йўналишда машҳурликка эришди. У кино оламидаги фаолияти давомида 30 га яқин фильмда суратга тушган.
“Жаноб ҳеч ким”, “Учар қиз”, “Уйланиш”, “Ҳай-ҳай қизалоқ”, “Мажнун”, “Пойга”, “Ваҳший”, “Қайсар ошиқлар” актриса ижодидаги муваффаққиятли фильмлар ҳисобланади. Актриса кинодаги фаолиятида танаффус эълон қилганидан кейин “Сохта”, “Учта сўз” каби тароналарини мухлисларига тақдим этди.
Асал Шодиева 2016 йилнинг 5 июнь санасида хонанда Шоҳруххон билан турмуш қурди. Жуфтликнинг тўйида ўзбек шоу-бизнесининг кўплаб таниқли вакиллари, жумладан Ўзбекистон халқ артисти Насиба Абдуллаева, Улуғбек Раҳматуллаев, Асилбек Ниғматов, Ботир Қодиров, Жаҳонгир Позилжонов, Ўзбекистон халқ артисти Юлдуз Усмонова, Шаҳзода ва ўзбек шоу-бизнесининг бошқа вакиллари иштирок этган.
Асал Шодиева турмуш қурганидан кейин кинофильмларда суратга тушишни камайтирди ва вақтини оилага сарфлади. Ижодга қайтганидан кейин актриса турмуш ўртоғининг “Юрак”, “Гулим” тароналарига ишланган видеоклипларда суратга тушди. Ҳозирда фарзанд тарбияси билан машғул бўлган Асал Шодиева хонандаликдаги ижодини ҳам давом эттирмоқда.
2020 йилнинг 3 сентябрь санасида Шоҳруҳхон ва Асал Шодиева илк марта ота-она бўлди. Улар биринчи фарзандига Муҳаммадюсуф деб исм қўйган. Орадан икки йил ўтиб актриса яна бир бор она бўлишини маълум қилди ва иккинчи фарзанди Бахтиёрни Туркияда дунёга келтирди.
Қуйида актриса иштирокидаги энг яхши фильмлар ҳақида маълумот берилади.
“Уйланиш” фильми
Режиссёр Жаҳонгир Аҳмедов томонидан 2009 йилда суратга олинган фильмда Асал Шодиева ҳамкасби Алишер Узоқов билан партнёр бўлган. Ушбу фильмда Асал Шодиева яхши кўрган инсонини севгиси учун курашишга ундайди ва синовдан ўтказади. Отасининг ҳайдовчисини ёқтириб қолган қиз турли хил синовлар билан бўлажак турмуш ўртоғини қай даражада уни яхши кўришини, мураккаб вазиятлардан қандай чиқиб кета олишини билиб олади. Кинокартинада Шоҳида Узоқова, Матёқуб Матчонов, Хосият Ҳусанова, хонанда Фарруҳ Комилов ва бошқа актёрлар рол ижро этган. Томошабинлар ушбу фильмни ҳалигача севиб томоша қилади.
“Учар қиз”
Актриса иштирокидаги кейинг муваффаққиятли фильм — “Учар қиз” кинокартинаси ҳисобланади. Асал Шодиева бу фильмда Адиз Ражабов билан партнёрликда рол ижро этган. Ўзга сайёралик қиз оддий қишлоққа келиб, бир оиланинг ҳаётини ўзгартириб юборади. Ҳар қандай дардни даволай олиши билан танилган “шаҳарлик қиз” қишлоқдаги кўплаб инсонлар ҳурматини қозонади. Бироқ биргина инсоннинг туҳмати билан барчаси ўзгариб кетади. Фильмнинг охирида ўзга сайёралик қиз ўз маконига учиб кетиб, яна қайтиб келади ва Адиз Ражабов уни ёқтириб қолади. Ушбу фильмда Саида Раметова, Жумадулла Раметов ва бошқа актёрлар иштирок этган. Фильм режиссёр Ёлқин Тўйчиев томонидан 2014 йилда суратга олинган.
“Севги фариштаси”
“Севги фариштаси” фильми ҳам Асал Шодиеванинг ижодида алоҳида ўрин тутган лойиҳалардан бири. Кинокартинада Дилниёз Ғаффоров яхши кўрган инсонининг қалбини забт этиш учун ҳаракат қилади. Бу борада унга дўсти ёрдам беради. Кутилмаганда унинг дўсти автоҳалокат сабаб вафот этади, бироқ шундан кейин ҳам у руҳ қиёфасида яқин дўстига ёрдам беришда давом этади. Дилниёз Ғаффоров яхши кўрган инсонига, яъни Асал Шодиевага унинг қалбини забт этишида яқин дўсти руҳ қиёфасида ёрдам берганини айтади. Қиз бунга ишонмайди ва йигитдан хафа бўлади, бироқ кинокартинанинг якунида у Дилниёзнинг алдамаганини тушуниб етади. Фильмда Алишер Узоқов, Асал Шодиева, Дилниёз Ғаффоров, Адиз Ражабов ва бошқа актёрлар иштирок этган.
“Ҳай-ҳай қизалоқ”
“Ҳай-ҳай” қизалоқ фильмидаги рол Асал Шодиеванинг бошқа образларидан тубдан фарқ қилади. Актриса бу фильмда эрка, ҳаётда ҳеч кимнинг гапи билан иш тутмайдиган, ўзидаги ҳеч нарсани яхши томонга ўзгартиришни истамайдиган образни гавдалантирган. Биргина қилинган хато иш туфайли бобоси билан қишлоққа жўнаб кетган қиз сохта севги туфайли ҳаётидаги кўп нарсани яхши томонга ўзгартиради ва бир қанча синовларни бошдан кечиради. Фильм якунида у сохта севгисини йўқотиб, ҳақиқийсини, ёмон инсонлардан воз кечиб яхшиларини топади. Бу фильм ҳаётдаги ҳар бир қилинган танловни яна бир қайта ўйлаб кўришга чорлайди. Кинокартинада хонанда Муниса Ризаева, Убайдулло Омон, Умид Искандаров ва бошқа актёрлар рол ижро этган. Актрисанинг бу лойиҳадаги ижроси салбий бўлса-да, томошабинлар унинг иштирокидаги бу фильмни ҳам яхши кутиб олган.
“Жаноб ҳеч ким”
2009 йилда суратга олинган “Жаноб ҳеч ким” фильмида актриса Асал Шодиева яна Алишер Узоқов билан партнёр бўлди. Томошабинлар эътирофига сазовор бўлган фильмда у кутилмаганда ҳаётига кириб қолган инсон аслида уни алдаганини билади. Барчаси кеч бўлишига бир баҳя қолганда, яна воқеалар бошқа томонга ўзгариб кетади. У танлаган инсон ҳаётнинг кўплаб қийинчиликларини бошдан кечирган, онасиз вояга етган инсон бўлади. Кинокартина якунида жуфтлик бахтли ҳаёт сари қадам ташлайди. Лойиҳада Ирода Носирова, Алишер Узоқов, Мадина Мумтоз, Гулчеҳра Эшонқулова ва бошқа машҳур актёрлар иштирок этган.
“Пойга”
Асал Шодиева “Пойга” фильмида оддий оилада вояга етган, олийгоҳда таҳсил олаётган қиз ролини ижро этган. Актрисанинг бу лойиҳадаги партнёри — Йигитали Мамажонов. Фильмда қиз отаси қидираётган қоидабузарни ёқтириб қолади, бироқ йигит аслида ким эканлигини ҳаммадан сир тутади, бунга эса ота-онасининг ўлимига сабабчи бўлган жиноятчининг қилган иши, қасос олиш нияти асос бўлади. Фильмда Матёқуб Матчонов, марҳум актёр Абдурайим Абдуваҳобов, Йигитали Мамажонов ва бошқа актёрлар иштирок этган.
“Мажнун”
“Мажнун” фильмидаги журналист қиз роли ҳам актрисанинг қай даражада маҳоратли эканини мухлисларга кўрсатиб берди. У фильмда кўп йиллар олдин ҳеч бир маълумотсиз йўқолган машҳур футболчини излаб топади ва у ҳақда лойиҳа қилишга қарор қилади. Кейинчалик қиз рафиқасининг вафоти туфайли мажнунсифат аҳволга келган йигитни яхши кўриб қолади ва кўплаб синовларни бошдан кечиради. Ҳаётига ҳеч кимни киритишни истамаган йигит қизни ранжитади. Тақдирга тан бериб, ўз уйига қайтиб кетган қизнинг ҳаёти кутилмаганда бошқа томонга ўзгариб кетади. Бу кинокартинада Улуғбек Қодиров, Муҳаммадисо Абдулхаиров, Раъно Шодиева, Матёқуб Матчонов ҳам ўз образларини маҳорат билан гавдалантирган.
Изоҳ (0)