Олий Мажлис Қонунчилик палатаси ва маҳаллий Кенгашлар сайловларига саноқли кунлар қолган бўлса-да, “Миллий тикланиш” демократик партияси томонидан ҳудудларда ўтказилаётган тарғибот тадбирлари ҳамда номзодлар билан учрашувлар янада қизғин паллага кирмоқда. Ана шандай учрашувлардан бири Марғилон шаҳридаги Эркин Воҳидов номидаги ижод мактабида бўлиб ўтди.
Тарғибот тадбирида партия Марказий кенгаши раиси Алишер Қодиров сўзга чиқиб, “Миллий тикланиш” демократик партияси томонидан навбатдаги сайловларда бежиз “Қадриятларга таянган тараққиёт” ғояси илгари сурилмаётганини қайд этди.
Кўриб турганингиздек, дунё ўзгаряпти, маънавий-ахлоқий таназзул борган сари кучаймоқда. Шу маънода, бутун дунёда кечаётган глобаллашув жараёнида барча мамлакатлар давлатчилик анъаналарини ўзларининг қадриятларига таянган ҳолда давом эттиришга ҳаракат қилмоқда. Ҳар бир халқнинг, элнинг ўзига хос қадрияти: тили, дини, адабиёти, маданияти, санъати, анъана-ю, урф-одатлари уларнинг ўзига хослигини таъминлаши мумкин. Шу нуқтаи назардан, тарихий-маданий меросимизни авайлаб- асраш, анъаналаримизни сақлаш ва ривожлантириш билан бирга иқтисодий тараққиётга ҳам айнан миллий қадриятлар орқали эришсак, бундан фақат халқимиз ютади.
Бугун ривожланган ғарб оиласини йўқотди, қадриятларини унутди, аёлни оиласидан узоқлаштириди ва бунинг оқибатлари қандай бўлаётганини кўриб турибмиз.
“Миллий тикланиш” партияси аёлнинг жамиятга фаол бўлиши тарафдори. Аёл жамиятнинг қурувчиси, устуни ҳисобланади. Агар аёл келажак авлодни дунёга келтириб, миллатни, ватанпарварларни тарбияламаса, жамият ривожи ҳақида гапириш мумкинми? Йўқ, албатта.
– Биз ҳар қандай тараққиётга розимиз. Одамларнинг даромади кўп бўлиб, тўкин яшаши, ҳар бир оила бекам-кўст бўлишини қўллаб-қувватлаймиз. Лекин тараққиёт халқимиз қадриятларига зид бўлмаслиги керак, – деди Алишер Қодиров.
“Миллий тикланиш” партияси барча аёлларнинг таълим олиши, илмли бўлиши тарафдори. Лекин шу билан бирга аёлнинг оила деган муқаддас қўрғоннинг асосий таянчи эканини ҳам асло унутмаслигимиз лозим. Ана шулардан келиб чиқиб, партия дастурида “Маърифатли она – қудратли миллат” тамойилига асосан хотин-қизларга оид партия сиёсатини янги босқичга олиб чиқиш, аёллар келажагимиз бунёдкорлари бўлган болаларни дунёга келтирувчилар ва уларнинг тарбиячилари бўлиши баробарида давлат ва жамият бошқарувида ўзларининг бой билими, малакаси ва кучини сафарбар этишга қодир улкан салоҳиятга эга, жамиятимизнинг фаол аъзолари эканлигини эътироф этган ҳолда муҳтарама аёлларимиз ҳаётини янада яхшилашга хизмат қиладиган бир қатор таклиф ва ташаббуслар илгари сурилган.
Жумладан, аёлларнинг оилада кўпроқ бўлишлари учун шароитлар яратиш мақсадида мослашувчан иш вақти ва фарзанд кўрган аёлларга бола уч ёшга тўлгунига қадар ҳақ тўланадиган “Оналик таътили” бериш тизимини жорий қилиш таклифлари шулар жумласидандир.
Тан олиш лозим, бугун ёшлар билан боғлиқ муаммоларнинг асосий сабаби бирламчи тарбиянинг тўғри берилмаётгани билан боғлиқ. Агар бола дастлабки уч йилликда онасининг бағрида ўсиб, сути билан озиқланса, унда шаклланган она меҳри ўсмирлик даврига келиб Ватанга муҳаббатга айланди. Боланинг онг остида табиий равишда ҳаётий мақсадлар – сабр-тоқат, қаноат, муаммоларини ҳал қилиш кўникмалари шаклланади. Аммо бу даврда аксарият оналар оилавий шароити сабаб, ҳатто бир ёшга етмаган фарзандини ўзгалар парваришига бериб, ишга чиқишга мажбур бўляпти. Шу боис, партия дастурида фарзандли аёл пул ҳақида ўйламасдан уч ёшгача боласининг тарбияси билан шуғулланиши, бунинг учун ҳақ тўланадиган “Оналик таътили” берилиши таклиф қилиняпти.
Дастурда бугун замонамизнинг долзарб масаласига айланган тарбия ва таълим билан боғлиқ кўплаб ғоялар илгари сурилганки, улар орасида энг муҳими “Янги авлод педагогларини тайёрлаш Давлат дастури”ни қабул қилиш ташаббусидир. Чунки сўнгги йилларда ушбу дастурнинг кераклигини ҳар куни ҳис қиляпмиз. Бугун фарзандларимиз умуман янгича даврда, ахборот технологиялари ривожланган асрда яшаяпти. Тан олишимиз лозим, айрим педагогларимиз замонавий талабларга жавоб бера олмаяпти. Айрим масалаларда ўқувчилардан ортда қоляпти. Шу боис, янги авлод педагогларини тайёрлаш ва ўқитувчилик касбини жозибадорлигини оширишга қаратилган чора-тадбирларни ишлаб чиқиш ва амалиётга жорий қилишга биринчи вазифа сифатида қараш зарур.
Албатта, “Миллий тикланиш” партияси инсон салоҳиятини рўёбга чиқаришга йўналтирилган, инсон қадри устувор бўлган халқпарвар жамият – Янги Ўзбекистонни барпо этиш, ҳаётимизнинг маъно-мазмунига айланган Учинчи Ренессанс пойдеворини барпо этишдек буюк мақсад йўлидаги ғоя ва ташаббусларнинг амалга ошишида Азиз сайловчиларнинг қўллаб-қувватловига таянади.
– Олий Мажлис Қонунчилик палатаси ҳамда маҳаллий Кенгашларга бўлиб ўтадиган сайловларда партиямиздан кўрсатилган номзодларга берадиган овозингиз Сизнинг бизга ишончингиздир. “Қадриятларга таянган тараққиёт!” ғояси атрофида бирлашиб, мамлакатимиз тараққиётини биргаликда таъминлаймиз, – деди Алишер Қодиров.
Учрашувда Олий Мажлис Қонунчилик палатаси ҳамда маҳаллий Кенгашларга кўрсатилган номзодлар ҳам сўзга чиқиб, марғилонлик сайловчиларни ўзларининг дастурлари билан таништирди. Учрашув савол-жавоблар билан давом этди.
Изоҳ (0)