Англиянинг “Манчестер Сити” клуби Германиянинг “Лейпциг” жамоасида тўп сураётган ҳужумкор ярим ҳимоячи Хави Симонс трансфери бўйича ҳаракат бошлади. Бу ҳақда журналист Саша Тавольери ўзининг Х (собиқ Twitter) саҳифасида хабар берди.
Манбага кўра, “шаҳарликлар” футболчининг агенти Али Барат билан музокараларни бошлаб юборган. “Манчестер Сити”нинг бразилиялик вингери Савиньо “Тоттенҳэм”га ўтиши кутилмоқда. Клуб раҳбарияти эса унинг ўрнини айнан Симонс билан тўлдирмоқчи.
Аввалроқ Симонс билан “Челси” клуби ҳам музокаралар олиб бораётгани ва келишув якуний босқичда эканлиги хабар қилинганди. Шу билан бирга, нидерландиялик футболчи “Лейпциг”нинг машғулотларида иштирок этмаётгани ҳам унинг тез орада клубни тарк этиши мумкинлигини кўрсатмоқда.
- Хави Симонс ўтган мавсум “Лейпциг” сафида жами 33 учрашувда майдонга тушиб, ўз ҳисобига 11 гол ва 8 ассист ёздириб қўйган.
- Футболчининг клуб билан шартномаси 2027 йилнинг ёзига қадар амал қилади.
- Transfermarkt портали нидерландиялик ярим ҳимоячининг қийматини 70 миллион еврога баҳоламоқда.
Изоҳ (0)