Таниқли ўзбек кинорежиссёри Баҳром Ёқубов 11 март куни 60 ёшида оламдан ўтди. Журналист Феруз Муҳаммад режиссёрнинг ҳамкасблари, шогирдлари билан суҳбатлашиб, уларнинг Баҳром Ёқубов ҳақидаги хотиралари билан бўлишди.
«Тириклигида қаерда эдингиз?!»
Ферузжон ижодингизни ниҳоятда ҳурмат қиламан, лекин бир савол туғилади, сиз ва сиз каби журналистлар нима сабабдан бир инсонни ўлганидан кейин уларнинг ижоди, фаолияти ҳақида интервьюлар олиши керак. Нима учун? Нима сабабдан Баҳром Ёқубов ҳақида ўлганидан сўнг интервьюлар олиш бошланди.
Шахсий ҳаёт билан ҳеч кимнинг иши бўлиши керак эмас, шахсий ҳаёт дахлсиз бўлиши лозим. Мен фақат Баҳром Ёқубов учун бу гапларни гапирмаяпман, умуман олиб гапиряпман. Ўлганидан сўнг хотира кўрсатув қилишнинг нима кераги бор. Одам ўлиб кетганидан кейин кўрсатувлар эмас, унинг ҳақига дуо қилишимиз керак. Ваҳоланки, интервьюларни тириклик вақтида қилиш керак эди. Яхши кўрсатув, интервью, мақола унинг ҳаётининг узайишига хизмат қиларди.
Қайсидир фильмларда роль ижро этиб, афсусланган вақтларим бўлган, «бекор ўйнабман шу фильмда», деб ҳалигача ўйлаб юраман. Аммо Баҳром Ёқубов фильмларида роль ижро этиб, афсусланмаганман. Яхши ижодкор, яхши режиссёр эди. Аллоҳ раҳматига олган бўлсин, илоҳим.
Матёқуб Матчонов, Ўзбекистонда хизмат кўрсатган артист
«Улуғбекни Улуғбек Қодиров, Шаҳзодани Шаҳзода қилган режиссёр эди»
Нафақат кинода, балки ҳаётда ҳам улардан кўп нарса ўрганганман. Бу инсоннинг гап-сўзларида хатó бўлмас эди, кам гапирардилар, аммо жуда ўринли гапни айтардилар. Ўзбеккино оламида нечта юлдуз чиққан бўлса, аввало, улар сабабчи бўлганлар деб ўйлайман. «Фотима ва Зуҳра» фильмини суратга олганларидан сўнг Улуғбек Қодиров, Шаҳзода, Гулчеҳра Эшонқулова, Убайдулла Омон каби ижодкорларнинг у фильмгача ҳам мухлислари бўлгандир, бироқ шу фильмдан кейин ҳақиқий юлдуз сифатида эътироф этилди. «Бахт учун миллион»ни суратга олганларида Севинч Мўминова гуркираб кетган, «Согдиана»дан сўнг Согдиана ижодий чўққига чиққан. «Супер келинчак» фильми орқали нафақат Адиз Ражабов ва Диана машҳурликка эришган, балки Мурод Ражабов ҳамда Саида Раметованинг ҳам қайтадан туғулиши бўлган деб ўйлайман. Улар томонидан суратга олинган бир қанча фильмларда суратга тушиш насиб этди. Яхши инсон эдилар, Аллоҳ раҳматига олсин.
Алишер Усмонов, актёр
«Менга чиройли кадр керак эмас», дердилар…
Институтни битирганимдан сўнг сериал суратга олганимни кўриб, мени ишга таклиф этганлар. «Ташландиқ» деб номланган фильмларида оператор бўлиб иш бошлаганман. Улар билан «Мажруҳ», «Супер келинчак», «Мистер Америка», «Ичкуёв», «Жодугар», «Ёндиради-куйдиради», «Мен юлдузман», «Бойвачча куёв» ва сўнгги фильмлари — «Ўзбекча ажралиш»ни биргаликда суратга олганмиз. Бу инсон ҳақиқий, профессионал режиссёр эди. Улардан олган сабоқларни бутун умр эсимдан чиқармасам керак. «Менга чиройли кадр керак эмас, менга сценарий бўйича олинган, драматургияси чиқадиган жонли кадр керак», дердилар. Агар фильм драматургияси чиройли кадрни талаб қилсагина, чиройли кадрлар олинарди.
«Муштарий» деб номланган сериал суратга олиш ниятида юргандилар. Сўнгги ҳаракатлари шу сериал бўйича эди. Ўзбеккино оламида жуда катта йўқотиш бўлди.
Умид Маликов, оператор
«Жуда кўпчиликнинг ҳаётида туб бурулиш қилганлар»
Кино оламига режиссёр бўлиш учун келганман. Жуда кўп режиссёрларга «шогирдликка олинг», деб илтимос қилганимда улар мени ўзларининг қора рўйхатига киргизиб қўйишган. Баҳром Ёқубовга шогирд тушиш учун бир неча бор ҳаракат қилганман, аммо мақсадимга ета олмаганман. Кейин бирдан ўзларидан таклиф келган. Шундан сўнг сценарий ёзишдан тортиб, токи фильм премьерасигача бўлган барча жараёнларнинг ипидан игнасигача ўргатганлар. Баҳром Ёқубов ўзбеккино оламида бугунги кунда оператор, режиссёр, рассом, актёр, актриса бўлиб фаолият юритаётган жуда кўпчиликнинг ҳаётида туб бурулиш қилиб берганлар. Уларнинг ҳаётини ўз ўрнига қўйиб берганлар. Бу жуда катта гап, катта савоб, катта иш деб ўйлайман. Улар билан «Ёндиради куйдиради», «Жодугар», «Бойвачча куёв», «Мажруҳ», «Фарҳод ва Ширин», «Мен юлдузман», «О Марям, Марям» фильмларида биргаликда ишлаш насиб этган.
Руслан Мирзаев, продюсер
Изоҳ (0)