Япония бош вазири Сигеру Исибанинг шахсий бойлиги деярли 33,8 миллион иенни (тахминан 218,2 минг доллар) ташкил этади. Бу кўрсаткич бўйича у ўз ҳукуматида 12-ўринда.
Бу ҳақида Япония Вазирлар Маҳкамаси томонидан эълон қилинган маълумотлар далолат бермоқда.
Бош вазирнинг асосий мол-мулки унинг Тоттори префектурасидаги уйи ҳисобланади. Япония ҳукумати раҳбари, шунингдек, 5 миллион иен (тахминан 32,3 минг доллар) банк депозитига эга. Шунингдек, мамлакатнинг етакчи оғир ва ҳарбий машинасозлик корпорацияси Mitsubishi Heavy Inductries ҳамда энг йирик электроэнергетика ишлаб чиқарувчи Tokyo Electric Power’да улушга эга.
Сигеру Исибадан аввал Япония бош вазири бўлиб ишлаган Фумио Кишида кўчмас мулк ва жами 186 миллион иен (1,2 миллион доллардан ортиқ) бўлган банк депозитларига эга бўлган.
Аввалроқ парламент қуйи палатасида ўтказилган иккинчи овоз бериш жараёнида Сигеру Исиба ухлаб қолгани акс этган видео муҳокамаларга сабаб бўлганди. Лекин бу ҳолат унинг ғалаба қозонишига ҳалақит қилмади.
Сигеру Исибага жами 221 нафар депутат овоз берган, унинг рақиби Ёшихико Нода эса 160 та овоз билан кифояланган.
“Мен бош вазир этиб тайинландим. Мен бу масъулиятни тантанали равишда ўз зиммамга оламан”, деди Исиба янги ҳукумат тузилганидан кейинги чиқишида.
Бош вазир, шунингдек, 27 октябрда бўлиб ўтган ўта муваффақиятсиз эрта парламент сайловларидан сўнг ўзи раҳбарлик қилаётган ЛДП партияси “ҳақиқий халқ партияси сифатида қайта туғилиши” зарурлигини таъкидлади.
Изоҳ (0)