Yaponiya bosh vaziri Sigeru Isibaning shaxsiy boyligi deyarli 33,8 million iyenni (taxminan 218,2 ming dollar) tashkil etadi. Bu ko‘rsatkich bo‘yicha u o‘z hukumatida 12-o‘rinda.
Bu haqida Yaponiya Vazirlar Mahkamasi tomonidan e’lon qilingan ma’lumotlar dalolat bermoqda.
Bosh vazirning asosiy mol-mulki uning Tottori prefekturasidagi uyi hisoblanadi. Yaponiya hukumati rahbari, shuningdek, 5 million iyen (taxminan 32,3 ming dollar) bank depozitiga ega. Shuningdek, mamlakatning yetakchi og‘ir va harbiy mashinasozlik korporatsiyasi Mitsubishi Heavy Industries hamda eng yirik elektroenergetika ishlab chiqaruvchi Tokyo Electric Power’da ulushga ega.
Sigeru Isibadan avval Yaponiya bosh vaziri bo‘lib ishlagan Fumio Kishida ko‘chmas mulk va jami 186 million iyen (1,2 million dollardan ortiq) bo‘lgan bank depozitlariga ega bo‘lgan.
Avvalroq parlament quyi palatasida o‘tkazilgan ikkinchi ovoz berish jarayonida Sigeru Isiba uxlab qolgani aks etgan video muhokamalarga sabab bo‘lgandi. Lekin bu holat uning g‘alaba qozonishiga halaqit qilmadi.
Sigeru Isibaga jami 221 nafar deputat ovoz bergan, uning raqibi Yoshixiko Noda esa 160 ta ovoz bilan kifoyalangan.
“Men bosh vazir etib tayinlandim. Men bu mas’uliyatni tantanali ravishda o‘z zimmamga olaman”, dedi Isiba yangi hukumat tuzilganidan keyingi chiqishida.
Bosh vazir, shuningdek, 27-oktyabrda bo‘lib o‘tgan o‘ta muvaffaqiyatsiz erta parlament saylovlaridan so‘ng o‘zi rahbarlik qilayotgan LDP partiyasi “haqiqiy xalq partiyasi sifatida qayta tug‘ilishi” zarurligini ta’kidladi.
Izoh (0)