“Дарё”да “Прокурорнинг айтганини қилмагани учун шу тарзда жазоланяпти. Қамаши прокурори тадбиркорга адолатсизлик қилаётгани ростми?” сарлавҳали мақола эълон қилинганди. Унда Бош прокуратура ҳузуридаги Иқтисодий жиноятларга қарши курашиш департаменти жамоатчиликка эълон қилган ахборотларининг бирида Қамаши туманидаги “П.С.” фермер хўжалиги раҳбари С.П. хўжаликнинг электр сув насосларини тижорат мақсадида тармоққа ўзбошимчалик билан улаб, катта миқдордаги электр энергиясидан ноқонуний фойдалангани, аммо фермернинг акаси асл вазият бошқалигини айтгани қайд этилганди. Қашқадарё прокуратураси мазкур мақолага муносабат билдирди.
“Қамаши тумани электр тармоқлари корхонаси томонидан ўтказилган рейд тадбирларида МЧЖ раҳбари С.П. жамиятга қарашли ер майдонида жойлашган артезиан қудуқда мавжуд бўлган икки дона қуввати 4,4 кВт/с бўлган насосларни электр энергиясидан фойдаланиш бўйича шартнома тузмасдан ноқонуний улаб фойдаланаётгани аниқланган. Бу ҳақда тегишли тартибда далолатнома расмийлаштирилиб, Ҳ.Сулаймонова номидаги Республика суд экспертизаси маркази вилоят бўлимининг хулосасига кўра, жамият томонидан туман электр тармоқлари корхонасига 170 миллион сўм миқдорда зарар етказилгани маълум бўлган.
Ушбу ҳолат бўйича қўзғатилган жиноят иши доирасида етказилган зарар қопланмагани сабабли жамият раҳбари С.П.га нисбатан “қамоққа олиш” эҳтиёт чораси қўлланилган. Иш ҳужжатларига кўра жорий йил 8 сентябрь куни масъуллар фермер фойдаланиб келаётган артезиан қудуқлардаги сув насосларини кўздан кечириш учун борганида С.П. ва оила аъзолари насос қудуқдан чиқарилиб текширилса носоз ҳолатга келиб қолишини айтган ва бунга қаршилик қилган. Шу сабабли насосларни қудуқдан чиқариб кўздан кечириш имкони бўлмаган ва бу ҳақда баённома тузилган.
Сўнгра соҳа мутахассисларидан иборат ишчи гуруҳ томонидан жорий йил 18 октябрь куни жамиятга қарашли ер майдонида жойлашган артезиан қудуқлардаги сув насослар очиб кўрилганида, уларнинг қуввати 1,1 кВт/с дан жами 2 та насоснинг умумий қуввати 2,2 кВт/с экани аниқланган ҳамда мутахассислар жамият томонидан туман электр тармоқлари корхонасига келтирилган зарар 90 миллион сўм эканини маълум қилган. Бироқ мазкур жамиятга қарашли 31,9 гектар ер майдонининг 2,7 гектар қисмида 2024 йилда қишлоқ хўжалик экинлари экилгани вилоят насос станциялари ва энергетика бошқармасининг маълумотномасида эса қуввати 1,1 кВт/с бўлган сув насоси ўртача 5,6 сотих ер майдонини суғориш учун етиши кўрсатилган.
Қайд қилинган артезиан қудуқлардаги сув насосларининг умумий қуввати 2,2 кВт/с бўлгани ҳақидаги важлар ва бу асосда тўпланган далиллар мутахассисларнинг хулосалари ҳамда дастлаб айбланувчи томонидан насосларни кўздан кечиришга қаршилик кўрсатилгани сабабли ишнинг ҳақиқий ҳолатларига номувофиқ ва асоссиз деб топилиб, тергов органининг 30 октябрдаги қарори билан рад қилинган. “П.С.А.” МЧЖ 2022 йилда ташкил этилган бўлиб муқаддам “С.И.” фермер хўжалигига қарашли бўлган 31,9 гектар ер майдонлари туман ҳокимлиги билан 2023 йилда тузилган шартномага асосан узоқ муддатли ижарага олинган. Мутахассислар томонидан ҳисобланган зарар жамият ташкил этилган кундан ҳисобланган. Жиноят иши юзасидан дастлабки тергов ҳаракатлари жорий йил 11 ноябрь куни якунланиб мазмунан кўриб чиқиш учун судга юборилган. Эндиликда жиноят иши судда кўриб чиқилиб, суд томонидан қонуний баҳо берилади”, дейилади вилоят прокуратураси масъуллари берган ахборотда.
Изоҳ (0)