“Дарё”га собиқ ИИБ ходими, тўғрироғи ЙПХда фаолият юритган фуқародан мурожаат келиб тушди. У мурожаатида ишдан ноҳақ бўшатилганини, Қашқадарё ИИБ масъулларининг ноқонуний ҳаракатларидан норози эканини маълум қилган.
2023 йил 7 май куни фуқаро Раҳмонқуловнинг мурожаати асосида Қарши шаҳар прокуратуси томонидан менга нисбатан терговга қадар текширув бошланди. Энг қизиғи менинг хатти-ҳаракатимдан норози бўлиб ёзилган ариза билан таништирилмадим, аризачи билан юзлаштирилмадим. 2023 йил 19 июнь ҳеч қандай жиноят аломати йўқлиги, Раҳмонқуловнинг мурожаатига асосан ўтказилган тезкор эксперимент қидирув тадбирида бирор бир жиноят аломатлари мавжуд бўлмаганлиги сабабли ЖПКнинг 83-моддаси 2-бандига асосан жиноят иши қўзғатиш рад этилди. Вилоят ИИБ масъуллари менга нисбатан хизмат текширувини амалдаги қонун ва қонуности ҳужжатларига зид равишда 10 кунлик муддатда эмас икки ой давом эттирди, дейди собиқ ИИО ходими, катта сержант Бунёд Халиев.
Собиқ ИИБ ходимининг айтишича, жиноят иши қўзғатишни рад этиш ҳақидаги прокуратура қарори чиққанидан сўнг, вилоят ИИБ масъулларидан бири, бошқарма бошлиғи ўринбосари З.Хўжанов уни хизмат хонасига чақириб, ўз хоҳишига кўра ишдан бўшаш ҳақида ариза ёзишини сўраган.
Мен ариза ёзмаслигимни айтдим. Шунда у менга ариза ёзмасам ҳам навбатдан ташқари аттестацияга қўйиб, тизимдан йўқотишини билдирди. Ва хонасидан чиқариб юборди. Орадан бир ярим ой вақт ўтиб навбатдан ташқари аттестацияга қўйилганим учун синов имтиҳонларини топширдим. Барча синовлардан яхши ўтганим учун менга эгаллаб турган лавозимига лойиқ деган хулоса берилди. Шундан кейин мен хизматимни давом эттирдим, дейди собиқ ЙПХ ходими.
Ишдан бўшатилганини айтган фуқаронинг маълумот беришича, 2023 йилнинг 28 декабрь куни унга қўнғироқ қилган Тошмуродова исмли фуқаро дабдурустдан бир иш юзасидан ундан 100 доллар олганини айтиб, қайтариб беришини сўраган.
Фуқаро менга телефон қилиб унга автоаварияда автомашинасига етказилган моддий зарарни мутахассис билан гаплашиб юқори нархлатиб бериш учун олинган 100 доллар пулни қайтаришимни сўради. Мен унга ҳеч қачон бу ҳақда гаплашмаганимизни 2023 йил 13 ноябрь кундаги суд қарорида ўзи ҳуқуқбузар деб топилганини эслатдим. Агар исботи бўлса, вилоят ИИБнинг олдига келишини, мен уни кутиб туришимни айтдим. У эса келмади. Шундан сўнг мен тунги хизматга жалб қилиндим. Кечки пайт 21:00 ларда менга майор У.Маҳмудов телефон қилиб, тезда Қашқадарё вилоят ИИБга етиб боришим кераклигини айтди. Борганимда ҳали тасдиғини топмаган мурожаат учун менга худди жиноятчидек муомала қилишиб, тушунтириш хати олиш давомида охирги телефон мулоқотимни эшиттиришди. “Пул олмаган бўлсанг, нега чақирасан”, дейишди. Мен уларга ўзимнинг айбсизлигимни бошлиқларим олдида исботлаш учун деб жавоб бердим. Шундан сўнг менга кетишим мумкинлигини айтишди. 2024 йилнинг 3 январь куни эса вилоят ИИБ бошлиғининг №1-сонли буйруғига асосан Қашқадарё вилояти Ички ишлар бошқармаси Қарши шаҳар Ички ишлар органлари фаолиятини мувофиқлаштириш бошқармаси бўйича жамоат хавфсизлиги хизмати йўл ҳаракати хавфсизлиги бўлими муҳандиси лавозимидан катта сержант унвони билан бўшатишди, дейди у.
Бунёд Халиевнинг тушунтириш беришича, мазкур буйруқ чиқарилишига 2024 йил 3 январь кунидаги хизмат текширув хулосаси асос бўлган экан.
2024 йил 3 январь куни вилоят ИИБ бошлиғи ўринбосари подполковник З.Хўжанов ўз хонасига чақиртириб менга хизмат текшируви ўтказилганини ва хизмат текшируви хулосаси билан интизомий жазо сифатида ишдан бўшатилганимни айтди. Хизмат текшируви хулосасини олдимга қўйиб, танишишимни сўради. Шунда мен ундан хизмат текшируви нега менинг иштирокимсиз ўтказилганини сўрадим. У менга эътирозинг бўлса, охирига ёзгин деди. Мен интизомли ходим бўлганим учун унинг топшириғини бажариб танишдим, лекин эътирозим борлигини ҳам ёздим. Аслида менинг ишдан бўшатилишимга Хўжановнинг ўзи бош-қош бўлди. У тасдиғини топмаган мурожаат учун фуқаро билан носамимий муносабатга киришгансан деб 17 йиллик тажрибамни ҳисобга олмай ишдан олдирди. Қарши шаҳар прокуратураси терговга қадар текширув давомида хизмат текширувида барча важларни холис ва ҳаққоний ўрганиб чиқиб, фуқаролардан тушунтириш хатлари олганди. Ҳаққоний ва холис текширув ўтказилгани учун адолатли қарор қабул қилинганди. Вилоят ИИБ менинг қарамоғимда икки нафар вояга етмаган фарзандим ва турмуш ўртоғим, нафақадаги онам борлигини, уларнинг таъминоти менинг зиммамда эканига эътибор қаратишмади. Шу сабаб ОАВ орқали чиқиш қилиб, менга нисбатан ўтказилган нохолис хизмат текшируви хулосаси бекор қилинишини шахсан Ички ишлар вазири Пўлат Бобожоновдан илтимос қиламан. Ҳолатни назоратга олишларини, 17 йиллик иш стажимни куйдирмасликларини сўрайман, дейди собиқ ходим.
Қашқадарё вилоят ИИБ ахборот хизмати “Дарё”нинг бу ҳақдаги сўровига жавоб қайтарар экан, Бунёд Халиевнинг ишдан олинишига етарли даражада сабаб бўлганини, ҳеч бир ходим сабабсиз ишдан бўшатилмаслигини маълум қилди. Бироқ, ходимнинг айнан нима сабабдан ишдан олинганини очиқлай олмасликларини қўшимча қилди.
Изоҳ (0)