ЮНЕСКОнинг Масжид ал-Ақсо бўйича охирги резолюциясига муносабат билдираётган исроиллик сиёсатчилар дипломатияни унутиб, ташкилотни кескин танқид остига олмоқда ва турли йўллар билан қарорга қаршилигини билдирмоқда. Мамлакат таълим вазири, ЮНЕСКО ишлари бўйича Исроил миллий комиссияси раҳбари Нафтали Беннет резолюцияни «шармандали» деб баҳолаган эди. Эндиликда мамлакат бош вазири Биньямин Нетаньяху қарорга муносабатини билдирди, деб хабар беради «РБК».
«Хўш, кейинчи? ЮНЕСКО қарори ер ёнғоқ мойи ва желе ўртасидаги алоқани инкор қиладими? Бэтмен ва Робин ўртасидаги алоқани? Рок ва Ролл ўртасидаги алоқани?», — деб ёзди ҳукумат раҳбари Twitter’даги саҳифасида.
Ибодатхона тоғи — Қуддус ҳудудида жойлашган майдон бўлиб, у яҳудийлар учун биринчи даражали, мусулмонлар учун учинчи даражали муқаддас қадамжо ҳисобланади. Ушбу майдонда қадимда Биринчи ва Иккинчи Қуддус ибодатхонаси мавжуд бўлган, бугун эса у ерда ал-Ақсо масжиди жойлашган.
13 октябрь куни ЮНЕСКО Миср ва Фаластин томонидан таклиф этилган резолюцияни қабул қилди. Унда Қуддусдаги ёдгорлик майдони ислом дини билан боғлиқлиги таъкидланади, яҳудий халқининг қадамжога алоқадорлиги ҳақида эса ҳеч нарса дейилмайди. Ҳужжат Исроилни Қуддусда мусулмонлар ҳақ-ҳуқуқларини бузаётгани учун қоралайди, шунингдек, бундан буён «Ибодатхона тоғи» атамаси ўрнига қадамжо «Масжид ал-Ақсо» деб аталишини кўзда тутади.
Резолюцияни 58 мамлакатдан 24 таси маъқуллади, булар орасида Россия, Хитой, Жазоир, Бангладеш, Марокаш, Уммон, Ливан, Қатар, Эрон, Мексика бор. Исроилни АҚШ, Буюк Британия, Литва, Нидерландия, Эстония ва Германия қўллаб-қувватлади, қолган 26 мамлакат овоз беришдан тийилди.
Изоҳ (0)