Коронавируснинг янги, юқумлироқ варианти туфайли 20 дан ортиқ мамлакат авиақатновларни чеклади

Буюк Британияда ва яна бир қатор мамлакатларда юқумлилик даражаси 70 фоизга кўпроқ бўлган коронавируснинг янги штамми аниқлангач, 20 дан ортиқ мамлакат авиақатновларга чекловлар киритди, деб ёзади Meduza.

BBC News хабарига кўра, Австрия, Аргентина, Бельгия, Болгария, Германия, Исроил, Эрон, Ирландия, Италия, Канада, Колумбия, Кувайт, Латвия, Литва, Марокаш, Нидерландия, Руминия, Туркия, Хорватия, Финляндия, Франция, Чили, Чехия, Швейцария, Эстония турли муддатларга Буюк Британиядан парвозларни тўхтатган.

Саудия Арабистони Ички ишлар вазирлиги вакили маълум қилишича, янги чекловлар «ушбу вируснинг табиати ҳақида маълум бўлмагунча» амал қилади. Улар ҳозирча бир ҳафтага киритилди ва яна узайтирилиши мумкин.

Саудия Арабистони қуйидаги чекловларни киритди:

• халқаро авиақатнов тўхтатилди. Қиролликка чет элдан кириб келишга улгурган рейслар мамлакатни тарк этиши мумкин;
• қуруқлик ва денгиздаги чегаралар вақтинчалик ёпилди;
• Европа мамлакатларидан ёки коронавируснинг янги штамми пайдо бўлган ҳар қандай давлатдан қайтиб келган фуқаролар икки ҳафтага ўзини ўзи яккалаши, COVID-19’га тест топшириши ва сўнг бундан ҳар беш кунда ўтиб туриши керак;
• сўнгги уч ой ичида Европадан ёки коронавируснинг янги штамми пайдо бўлган мамлакатдан қайтиб келганлар ҳам мажбурий тартибда тест топшириши керак.

Чоралар агентликнинг соғлиқни сақлаш департаменти тавсияси билан қабул қилинди. У парвозларнинг тўхтатилишини вирусни тийиб туриш учун зарур чора деб ҳисоблади.

Хабарда аниқлик киритилишича, яқин орада коронавируснинг янги тури ҳақида батафсилроқ маълумот пайдо бўлиши мумкин. Йўловчи авиақатновларини давом эттириш масаласи янги маълумотларга боғлиқ бўлади.

Исроил ҳам Буюк Британия, Дания ва Жанубий Африка Республикаси (ЖАР)да коронавируснинг янги штамми аниқлангани сабабли ушбу мамлакатлар билан авиақатновни тўхтатиб қўйди.

«Коронавируснинг янги тури Исроилга кириб келмаслиги учун барча имкониятни ишга соляпмиз. Биз Буюк Британия, Дания ва ЖАРдан келадиган барча рейслар учун осмонимизни ёпдик. Бу мамлакатларда мутацияга учраган коронавирус топилган. Зарур бўлса, рўйхатга бошқа мамлакатлар ҳам қўшилади», — деб ёзди Исроил бош вазири Биньямин Нетаньяху ўз Twitter’ида.

Туркия Буюк Британиядан ташқари, Дания, Нидерландия ва ЖАР билан, Швейцария ҳам ЖАР билан парвозларни тўхтатди. Швеция Британия билан авиақатновни 21 декабрдан тўхтатмоқчи.

Буюк Британия Соғлиқни сақлаш вазирлиги коронавируснинг янги тури аниқлангани ҳақида 14 декабрь куни маълум қилган эди. Англия бош санитар шифокори Крис Уитти бу турдаги вирус «одатий» SARS-CoV-2’дан кўра тезроқ тарқалаётганини қайд этди. Буюк Британия бош вазири Борис Жонсоннинг сўзларига кўра, коронавируснинг янги генетик варианти 70 фоизга юқумлироқ бўлиши мумкин.

Инфекциянинг янги штамми аниқлангани муносабати билан Англия жануби-шарқида, хусусан, Лондонда 20 декабрдан эътиборан чекловларнинг юқори, тўртинчи даражаси жорий этилди, ҳозирча бу тартиб яқин икки ҳафта амалда бўлади. Унга кўра, маҳаллий аҳоли ўта заруратсиз уйдан чиқиши, шунингдек, Янги йил байрами тантаналарида бир неча оила бўлиб тўпланиши мумкин эмас. Хавфнинг тўртинчи даражаси эълон қилинган ҳудудларда фақат дорихоналар ва биринчи зарурат дўконлари ишлайди. Худди шундай чекловлар 20 декабрдан Уэльсда, 26 декабрдан эса Шотландияда ҳам жорий этилади.

Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Аввалроқ ЖАРда ҳам шунга ўхшаш мутациядаги вирус топилгани ҳақида хабар берилган эди.