Киноактёр бўлиш қандай ажойиб: мухлислар, нуфузли мукофотлар, шон-шуҳрат ва гонорарлар. Аммо салбий томони ҳам бор — баъзида жуда ҳолдан тойдирадиган ва ҳатто хавфли бўлиши мумкин бўлган суратга олиш ишлари. Кимдир муздек сувда сузиши керак, кимдир зўрға топилган деликатесларни ҳамкасбларига улоқтириши керак.
Николай Рибников
Дастлаб «Қизлар» фильмидаги Иля Ковригин роли учун Владимир Трешалов танланган, аммо Николай Рибников бу образни ўйнашни жуда хоҳлайди. Бунинг учун у 2 ҳафта ичида 20 кг га озиб, ролни қўлга киритади.
Аммо бу актёр суратга олиш жараёнида ўтиши керак бўлган сўнгги синов эмас эди. Фильм ижодкорлари Тося дарахт кесувчиларга қўзиқорин шўрва олиб келган саҳнани суратга олинаётганда ҳаво жуда совуқ эди. Шўрва ўрнига қозонда оддий қайноқ сув бўлади. Бир пайт Николай Рибников ролга шунчалик киришиб кетадики, қошиқни ялаб олади, натижада қошиқ лабига ёпишиб қолади. Режиссёр шифокорни чақирмоқчи бўлади, лекин актёр музлаб қолган қошиқни лабидан шартта кўчириб олади.
Леонид Куравлёв ва Юрий Яковлев
«Иван Василевич ўз касбини ўзгартиради» фильмидаги ҳашаматли шоҳона тушлик столини ушбу ёрқин комедияни томоша қилган ҳар бир киши эслайди. Одатда совет киносида сунъий ясама таомлар ишлатилган, аммо Леонид Гайдай бошқача йўл тутади — у ўз пулини, яъни 200 рублни (ўша пайтда ўртача ойлик маошдан кўпроқ эди) ҳақиқий икра ва осётр олиш учун сарфлайди.
Шу сабабли Леонид Куравлёв ва Юрий Яковлев қаҳрамонлари камончиларга дастурхондаги ноз-неъматларни отишганда, нафақат актёрлар, балки бутун суратга олиш гуруҳи ғазабдан титраб кетади.
Наталя Крачковская
Наталя Крачковскаянинг қаҳрамони айтадиган саҳна: «Сениям даволашади, сениям даволашади. Мениям даволашади» жумласи актриса учун осон бўлмаган. У бир вақтнинг ўзида иккита парик кийиши керак эди, париклар терини даҳшатли тарзда қичиштирганидан унинг юзи шишиб кета бошлайди. Актриса айнан шу эпизодни суратга олиш пайтида йиғлаганини яхши эслайди.
Анатолий Папанов
«Бриллиант қўл» фильмидаги «Клев» эпизодини суратга олиш пайтида Анатолий Папанов совуқ сувда кўп қолиб кетади, сувнинг ҳарорати тахминан 8°C эди. Режиссёр ёрдамчиси «техник сабабларга кўра» керакли кадрни суратга ололмайди. Шунда актёр ўзини тута олмайди ва «Аҳмоқ!» деб бақиради. Режиссёр Леонид Гайдайга бу кадр ёқиб қолганидан айнан шу саҳна якуний версияга киритилади.
Петерис Гаудинш
«Жасоратли рицар Айвенго ҳақида баллада» фильмини суратга олиш жараёнида маблағ билан боғлиқ муаммолар бошланади. Актёрлар учун аренада отларда машқ қилишга пул тўлашолмайди. Айвенго ролини ижро этган Петерис Гаудиншнинг сўзларига кўра, уни тайёргарликсиз отга миндиришган ва дарҳол суратга олишган.
Мавзуга доир:
- «Тутқич бермас фирибгар», «Ўзга сайёралик», «Линколн» — Стивен Спилбергнинг энг яхши фильмлари
- Қаҳрамонлари қиёфасини ўзгартириб, фильмнинг омадли чиқишига ҳисса қўшган актёр ва актрисалар
- Ҳамманинг оғзида «Уэнздей»: нима учун Аддамслар оиласининг ғамгин қизи ҳақидаги сериал рекордларни янгиламоқда?
Изоҳ (0)