“Зита ва Гита” фильми қандай суратга олинган: суратга олиш майдончасидан кадрлар ва фильм ҳақидаги 13 та қизиқарли факт

Икки эгизак қиз ҳақидаги “Зита ва Гита” фильми энг машҳур ҳинд фильмларидан бири десак, ёлғон бўлмайди. Қуйида мазкур фильм қандай суратга олингани ва унда юз берган қизиқарли воқеалар ҳақида маълумот берамиз.

1. Бир неча йил режиссёр ёрдамчиси сифатида ишлаган Рамеш Сиппи 1971 йилга келибгина ўзининг биринчи мустақил фильми “Андоз”ни суратга олади, фильм катта муваффақият қозонади.

Шу билан тўхтаб қолишни истамаган Рамеш дарҳол янги фильми учун ғоя излашга киришади. “Рам ва Шиам” фильми туфайли унда эгизак опа-сингиллар ҳақида фильм суратга олиш ғояси пайдо бўлади. Эгизак ака-укалар ҳақидаги ғояни у дарҳол рад этади, акс ҳолда у тўртинчи фильм бўлар эди. Лекин ҳинд кинематографиясида эгизак опа-сингиллар ҳақида фильм бўлмаганди.

Қизиғи шундаки, режиссёр Прамод Чакраборти 1967 йилда чиққан ва эгизак ака-укалар ҳақида ҳикоя қиладиган “Рам ва Шиам” фильмидан илҳомланиб, эгизак опа-сингиллар ҳақида фильм суратга олишни режалаштиради. Лекин Рамеш Сиппи аллақачон ушбу ғоя устида ишлаётганини билиб, уни кўчирмакашликда айблашмасликлари учун бундай фильм суратга олишни истамайди.

Шунга қарамай, кейинчалик Прамод Чакраборт “Қасоскор” фильмини суратга олади ва у ҳам катта муваффақият қозонади.

2. Эгизак опа ролини ижро этиш учун Рамеш Сиппи ўзининг ҳит бўлган “Андоз” фильмида суратга тушган актриса Ҳема Малинини таклиф қилади. Ҳема Малинининг айтишича, у “Рам ва Шиам” фильмини жуда яхши кўрган, аммо ҳеч қачон ўзи ҳам характери турлича бўлган опа-сингил ролларини ўйнайман деб ўйламаган.

Бироқ Малини режиссёр рўйхатидаги биринчи актриса эмасди. Бошида у эгизаклар роли учун машҳур актриса Нутанни таклиф қилишни ният қилган, лекин продюсерлар бу фикрга қарши чиқади, чунки актриса бу роль учун қариб қолганди — Нутан ўша пайтда 36 ёшда бўлиб, Зита ва Гита эса ёш қизлар эди.

Шундан сўнг ушбу роль учун актриса Мумтозни таклиф қилишади — актриса “Рам ва Шиам”да суратга тушганди. Аммо Мумтоз жуда юқори гонорар сўраганлиги сабаб продюсерлар ўзлари уни хизматидан воз кечишга қарор қилади.

Шундан сўнггина бу ролни Ҳема Малинига таклиф қилишади ва актриса бу ролни қабул қилади.

3. Зита ва Гитанинг йигитлари ролига актёр топиш борасида баъзи қийинчиликлар юзага келади.

Бир эркак роли учун машҳур ҳиндистонлик актёр Ражеш Кҳаннани чақиришади. Ражеш ролни қабул қилади, лекин шарт қўяди: фильм барибир эгизак ака-укалар ҳақида бўлиши ва бу ролларни у ижро этиши керак. Лекин режиссёр фильм опа-сингиллар ҳақида бўлиши кераклигини таъкидлаб туриб олади. Шу сабабли Кҳаннани рад этишга тўғри келади.

Оқибатда Гита севгилиси (Рави) ролига ҳиндистонлик актёр Санжив Кумар олинади. Муаммо шундаки, актёр роли учун катта гонорар сўрайди. Аммо бошқа номзодлар қолмаганлиги сабабли Рави роли учун айнан Санживни олишга тўғри келади.

4. Сценарий устида муаммолар давом этади, чунки икки ёш сценарий муаллифлари бирор тўхтамга келолмай қолишади. Баъзи тортишувлар ҳатто муштлашувгача боради.

5. Ҳема Малини ва Санжив Кумар “Зита ва Гита” суратга олинишидан олдин ҳам таниш эди. Бундан ташқари, Санжив бир неча бор актрисани қўлини сўраган. Бироқ бу муносабатлар тўйгача етиб бормаган.

Аммо Рака ролини ижро этган актёр Дҳармендра билан (Зитанинг севгилиси) Ҳема таниш эмасди. Аммо суратга олиш жараёнида Ҳема Малини Дҳармендранинг унга бўлган нозик ҳис-туйғуларини ҳис қилади, аммо унга жавоб қайтаришга шошилмайди. Ҳақиқатдан ҳам актриса унга ҳиссиётини билдиришдан қўрқарди, чунки Санживнинг бу гапларни билишини хоҳламасди.

6. Ҳема Малини ва Санжив Кумар роликли конкида учишни билмасди, шунинг учун улар жуда кўп йиқилса-да, суратга олиш майдончасида конки учишни ўрганишларига тўғри келади.

7. Баъзи фильм саҳналари сценарийда ёзилмаган. Ҳаммаси режиссёрнинг ғоясига кўра суратга олиш жараёнида пайдо бўлган. Масалан, Гитанинг шифтга ўрнатилган парракка чиқиб олиш саҳнаси шу тарзда ўйлаб топилган.

Дастлаб ушбу ғоя актрисага ёқмайди, шунинг учун у режиссёр Рамеш Сиппидан буни ўзи кўрсатиб беришини сўрайди. Сиппи ростдан ҳам парракка чиқади. Шундан кейингина Ҳема Малини вентиляторга чиқишга рози бўлади.

8. Ҳема Малини ролларини адаштириб юбормаслиги учун бир куни фақат Зитанинг, бошқа куни эса фақат Гитанинг саҳналари суратга олинади.

Лекин Ҳеманинг айтишича, қаҳрамонларни чалкаштириб юбориш деярли имконсиз эди. Унга грим қилиниши ва костюм кийдирилиши билан дарҳол қайси персонажни ўйнаётганини ҳис қиларди. Бундан ташқари, актрисанинг тан олишича, грим ва кийим алмаштиргач, ҳатто унинг юриши ҳам автоматик тарзда ўзгариб қоларди.

9. Агар Ҳиндистон-Покистон уруши бўлмаганида “Зита ва Гита” фильми 1971 йилда чиқиши керак эди. Ушбу можаро сабаб фильмни суратга олиш жараёни бир йилдан кўпроқ вақтга тўхтатиб қўйилади.

10. Ҳема Малинига турлича характердаги опа-сингилларни ўйнаш қийин бўлмаган, чунки у ҳар бирининг характерига эга эди.

11. “Зита ва Гита” фильми кенг омма орасида машҳурликка эришгач, 1972 йилнинг энг кассабоп фильмига айланади. Шундан сўнг режиссёр Рамеш Сиппи янги “Қасос ва қонун” фильмини суратга олишни режалаштиради ҳамда “Зита ва Гита”даги танилган актёрларни асосий ролларга таклиф қилишга қарор қилади, хусусан Ҳема Малини, Санжив Кумар ва Дҳармендра мазкур фильмда ҳам роль ўйнайди.

Айнан “Қасос ва қонун” фильмининг суратга олиш жараёнида Ҳема Малини Дҳармендра билан романтик муносабатларга киришади. Аммо Ҳема Малининг отаси бу никоҳга қарши эди, чунки Дҳармендра уйланган ва икки фарзандини тарбиялаётганди. Шунинг учун жуфтлик актрисанинг отаси вафот этганидан кейин ва актёр ажрашгандан сўнггина турмуш қуради.

Бу никоҳдан уларнинг икки фарзанди дунёга келади. Кейинчалик актриса “Hema Маlini Creations” номли продюсерлик компаниясига асос солади.

12. Кўпчилик учун ҳинд фильмлари қўшиқлар билан чамбарчас боғлиқ. “Зита ва Гита” ҳам бундан мустасно эмас. Одатда актёр ва актрисалар фильмдаги қўшиқларни ўзлари ижро этмайди. Бунинг учун профессионал қўшиқчилар жалб этилади.

Кинода актёрлар ўрнига қўшиқ айтадиган хонандалар унчалик кўп эмас. Лата Мангешкар ёлғиз ўзи Болливоод фильмлари учун 25 мингдан ортиқ қўшиқ куйлагани учун ҳатто Гиннеснинг рекордлар китобига киритилган. Шунинг учун ҳам ҳинд фильмларида қўшиқ ижро этилаётганда овозлар бир хил туюлиши мумкин.

13. СССРда “Зита ва Гита” фильми ҳам жуда машҳур бўлган. Аммо Совет прокатига фильм бир оз қисқартирилган ҳолда етиб келган — тахминан 13 та саҳна кесиб ташланган.