Истанбул романтикаси: турк қаҳваси, гилам бозори, чағалайлар бўлган шаҳарнинг энг яхши жойлари (фото)

Ажойиб тарихга эга қуёшли шаҳар — Истанбулга бўлган саёҳатингиз маршрутини режалаштириш ва таътилингизнинг давомийлигига қараб ҳамма нарсага қандай улгуриш мумкинлиги бўйича «Wday.ru» фойдали маслаҳатлар беради.

Фақат дам олиш кунлари учун: тарихий марказ

Истанбулга дам олиш кунлари тарихий жойларга ташриф буюриш лозим: барча диққатга сазовор жойлар бир-бирига яқин масофада жойлашган, йўлга вақт сарфламайсиз.

Агар сиз шаҳарни бир қарашда севиб қолишни истасангиз, аввал турк ошхонасидан бошланг. Истанбулда тушликни ўтказиб юборишингиз мумкин, аммо нонуштани ҳеч қачон. Айвонли кафе ёки ресторанни танланг (масалан, Seven Hills ёки Queb Lounge) ва туркча нонушта буюртма қилинг. Овқатларнинг хилма-хиллиги ва ёқимли мазасидан ҳайратда қоласиз.

Таомланиб, чағалайларни томоша қилиб, Босфор ҳавосидан баҳра олгандан сўнг нафақат тарихий марказ, балки бутун шаҳарнинг асосий диққатга сазовор жойи – Аё София масжидига боринг. Бу «дунёнинг саккизинчи мўъжизаси» деб номланадиган жаҳон меъморчилигининг энг муҳим ёдгорликларидан бири.

Яна бир муҳим меъморий ёдгорлик – Султон Аҳмед масжиди ёки Мовий масжид. Истанбулдаги барча масжидларда бўлгани каби Султон Аҳмедга кириш ҳам мутлақо бепул. Ичкарига кириш ва нақшлардан баҳраманд бўлиш учун иш вақти билан танишиб чиқинг ва ташқи кўринишингизга эътибор беринг: аёллар бошига рўмол ташлайди, ёпиқ пойабзал кийинг ва кираверишда оёқ кийимингизни ечиб олинг.

10-12 метр чуқурликда жойлашган, бугунги кунгача сақланиб қолган қадимий ер ости сув омбори — Базилика сардобасига боришни унутманг. Ушбу салқин хонада сиз нафақат қайноқ қуёшдан қочибгина қолмай, балки ўзингизни ноёб энергия билан сирли жойнинг бир қисми каби ҳис қилишингиз мумкин.

Сайёҳларнинг диққатга сазовор жойларидан яна бири – Катта сарой мозаикалари музейи. Сиз нафақат эстетик завқ оласиз, балки ноёб маданият намуналаридан ҳайратда қоласиз. Мозаикалар минглаб деталлардан иборат бўлиб, улар ниҳоятда реалистик тарзда яратилган, шунинг учун ҳам юз йилдан ошиқ вақт ўтса-да, рассомларнинг маҳорати ҳайратга солмай қолмайди.

Шунингдек, Тўпқопи саройига ташриф буюриш учун 2-3 соат ажратинг. XV асрда қад ростлаган сарой мажмуаси азалдан Усмонли ҳукмдорларининг қароргоҳи бўлиб келган ва ҳозирда у дунёдаги энг йирик музей мажмуаларидан бири ҳисобланади. Ҳудуд тўртта ҳовлидан иборат бўлиб, уларнинг ҳар бири диққатга сазовор жойларга бой.

Турк ошхонасининг рамзий таомларини татиб кўринг: лўла кабоб (қовурилган гўшт), кёфте (турк котлетлари), симит (кунжутли нон), дўндурма (музқаймоқ), лукум (турк ширинлиги) ва албатта, баклава (паҳлава) — буларнинг барчасидан олиб, сайрга чиқиш мумкин.

Айтганча, қирғоқда турк фастфудлари билан савдо қиладиган расталарни ёддан чиқарманг. Улар жуда жозибали кўринмаслиги мумкин, аммо маҳаллий аҳоли кўпинча шу ерда овқатланади. Балик экмек — туркча скрумбия сендвичини татиб кўрганингиздан афсусланмайсиз.

Ва албатта шаҳарнинг янги, европача қисмида овқатланишингиз мумкин. Масалан, замонавий жойлардан бирида ёки Zorlu савдо-кўнгилочар марказида. Қадимий кўчалар ва замонавий туманлар контрасти ҳар бир сайёҳга хуш ёқади.

Латте ёки каппучино эмас, балки иссиқ қум устида пиширилган туркча қора қаҳва ичиб кўрмасангиз, кўп нарсани йўқотасиз. Ичимлик жуда хуштаъм бўлиб, таъми узоқ вақтгача оғзингизда қолади.

Чой ҳам Туркияда жуда машҳур: маҳаллий аҳоли учун чой ичиш сиз ҳам қўшилишингиз мумкин бўлган бутун бир маданиятдир. Хушбўй турк чойи аввал татиб кўрганларингизга ўхшамайди.

Узоқ дам олиш кунлари учун: гавжум маҳаллалар

Агар сизнинг Истанбулдаги саёҳатингиз бир неча кун билан чекланмаса, тарихий марказга ташрифингизга жойлар ҳам қўшилиши керак. Ҳаёт бир дақиқа ҳам тўхтамайдиган бизнес, дам олиш ва маданият маркази — Beyog‘lu туманига 1-2 кун ажратинг.

Истиқлол кўчаси бўйлаб юришдан бошланг. Унинг номи «Мустақиллик» деб таржима қилинади ва чиндан ҳам: замонавий ресторанларнинг ёнида арзон ресторан, барча мазҳабдаги ибодатхоналар тунги клублар ва барлар билан бир вақтда жойлашган ва шарқ меъморчилиги бинолари ғарбий маданият бинолари билан туташиб кетган. Аммо, афсуски, эпидемиологик вазият туфайли ҳозир ҳамма жойларга ташриф буюриш имконияти мавжуд эмас.

Кўча пиёдалар ҳаракатланиши учун, аммо битта истисно мавжуд: бу ерда эски қизил трамвай 1871 йилдан бери ишлайди – бу эсдалик совғаларида тасвирланган шаҳарнинг ташриф қоғози ҳисобланади. Трамвай, шунингдек, Истанбулнинг марказида жойлашган Тақсим майдонида тўхтайди.

Трамвай сизни Галата минорасига олиб боради, уни Истанбулнинг деярли барча нуқталаридан кўриш мумкин. Унинг ўлчамлари ҳайратланарли: 60 метрдан (денгиз сатҳидан 140 метр) баландликдан шаҳарнинг ажойиб кўриниши намоён бўлади. Бинобарин, минора нафақат тарихий ёдгорлик, балки бир қарашда Босфор кафтдек кўринадиган ажойиб кузатув майдончасидир.

Дам олишни режалаштиришда қийинчиликларга дуч келмаслик ва Истанбулда дам олиш кунлари янада қизиқроқ бўлиши учун сиз туроператорлар хизматларидан фойдаланишингиз мумкин. Меҳмонхоналарни брон қилишда метро ёки трамвай бекатининг яқинидаги вариантларни танлаган маъқул.

Тўлиқ ҳафта учун: ҳақиқий кўчалар ва қайиқ сафари

Тарихий жойларни ўрганиб чиқдингиз, қизил трамвайда сайр қилдингиз ва ҳатто дўконларга бордингиз ва ҳали ҳам вақтингиз борми? Ундай ҳолда сайёҳлар орасида машҳур бўлиб бораётган Истанбулнинг гўзал тумани — Балатга ташриф буюришингиз керак.

Бу ерда машҳур музейлар, замонавий саройлар ва қадимий масжидлар йўқ, аммо мамлакат учун одатий бўлмаган меъморчиликка тўла ёрқин кварталлар мавжуд. Шаҳарнинг ушбу кўчалари таърифлаб бўлмайдиган муҳит яратади — бундай Туркияни сиз ҳали кўрмагансиз.

Босфор гўзаллиги — Қора ва Мармара денгизларини боғлайдиган бўғозни кўрмасдан туриб, Истанбулга ташрифни тўлиқ деб атаб бўлмайди.

Бундан ташқари, кема фонида шаҳарни суратга олиш учун идеал жой. Айтганча, дельфинларни кўпинча Босфорда кўриш мумкин.

Шу билан бир қаторда, XII асрда бўғознинг тепаликли қирғоғида қурилган Йорос қалъасига ташриф буюришингиз мумкин. Ёки Истанбулдан тахминан икки соат узоқликда жойлашган Шаҳзодалар оролларига паромда боринг. Европа ва Осиёни боғлайдиган бўғоз манзараси ҳамда бир пиёла чой саёҳатингиз учун энг яхши якун бўлади.