Эронда гемодиализ эритмасига тушиб қолган алюминий тузлари туфайли 70 нафар бемор ҳалок бўлди. Бу ҳақда мамлакат парламентининг соғлиқни сақлаш комиссияси матбуот котиби Салмон Эсхаги хабар қилди.
“Аввалига Машҳад ва Исфахон шаҳарларида 10-12 нафар бемор комага тушиб қолиб, кейин ўзига келмай вафот этди. Кейинчалик қурбонлар сони 50 кишига кўпайди. Бугунга келиб гемодиализ эритмасидаги алюминий тузлари туфайли ҳалок бўлганлар сони 70 нафарга етди”, деди у.
Матбуот котибининг сўзларига кўра, тергов давомида бу ҳолат дори ишлаб чиқарувчи компаниянинг хатоси туфайли рўй бергани аниқланди.
- Ўзбекистонда “Док-1 Макс” дори воситасидан заҳарланиб 68 нафар бола ҳалок бўлгани аниқланганди.
- Мазкур дорилар Ҳиндистоннинг Марион Пвт. Ltd компанияси томонидан ишлаб чиқарилган. Препарат ва сиропларни қабул қилган беморларда ножўя таъсирлар кузатилган. Экспертиза натижаларига кўра, “Док-1 Макс” шамоллашга қарши препарат ва сироп бўлиб, маҳсулотнинг бир неча партиясида заҳарли моддалар аниқланган. Мазкур ҳолатдан сўнг мамлакатдаги барча дорихоналарда мазкур дори воситасининг сотилиши тақиқланиб, улар савдодан қайтариб олинган.
- Мазкур ҳодиса юзасидан ўтказилган суд иши жорий йил 26 февралда якунига етди. Тошкент шаҳар судларининг Жиноят ишлари бўйича судлов ҳайъати томонидан сироп воқеасида айбланаётган 23 нафар судланувчига ҳукм ўқилди.
Изоҳ (0)