Eronda gemodializ eritmasiga tushib qolgan alyuminiy tuzlari tufayli 70 nafar bemor halok bo‘ldi. Bu haqda mamlakat parlamentining sog‘liqni saqlash komissiyasi matbuot kotibi Salmon Esxagi xabar qildi.
“Avvaliga Mashhad va Isfaxon shaharlarida 10-12 nafar bemor komaga tushib qolib, keyin o‘ziga kelmay vafot etdi. Keyinchalik qurbonlar soni 50 kishiga ko‘paydi. Bugunga kelib gemodializ eritmasidagi alyuminiy tuzlari tufayli halok bo‘lganlar soni 70 nafarga yetdi”, dedi u.
Matbuot kotibining so‘zlariga ko‘ra, tergov davomida bu holat dori ishlab chiqaruvchi kompaniyaning xatosi tufayli ro‘y bergani aniqlandi.
- O‘zbekistonda “Dok-1 Maks” dori vositasidan zaharlanib 68 nafar bola halok bo‘lgani aniqlangandi.
- Mazkur dorilar Hindistonning Marion Pvt. Ltd kompaniyasi tomonidan ishlab chiqarilgan. Preparat va siroplarni qabul qilgan bemorlarda nojo‘ya taʼsirlar kuzatilgan. Ekspertiza natijalariga ko‘ra, “Dok-1 Maks” shamollashga qarshi preparat va sirop bo‘lib, mahsulotning bir necha partiyasida zaharli moddalar aniqlangan. Mazkur holatdan so‘ng mamlakatdagi barcha dorixonalarda mazkur dori vositasining sotilishi taqiqlanib, ular savdodan qaytarib olingan.
- Mazkur hodisa yuzasidan o‘tkazilgan sud ishi joriy yil 26-fevralda yakuniga yetdi. Toshkent shahar sudlarining Jinoyat ishlari bo‘yicha sudlov hayʼati tomonidan sirop voqeasida ayblanayotgan 23 nafar sudlanuvchiga hukm o‘qildi.
Izoh (0)