“Биз янги Қорақалпоғистонни кўрдик” — чет элда яшаётган қорақалпоқ диаспораси фаоллари мамлакат бўйлаб саёҳат қилди

Қорақалпоғистонда туғилиб, шу ерда яшаб, кейинроқ Қозоғистон ва Россияга кўчиб кетган қорақалпоқ диаспораси фаоллари ва бир гуруҳ қорақалпоқ фахрийлари мамлакатда амалга оширилган бунёдкорлик ишлари билан танишди. Бу ҳақда “Дарё” мухбири хабар бермоқда.

Меҳмонлар дастлаб Тахтакўпир туманига ташриф буюрди. Қадим тарих рамзига айланган, асрлар оша ўз балиғи билан халқни боққан Қаратерен кўли ҳудуди айни вақтда этнотуристик манзилга айланмоқда.

Яна бир манзил — Нукус шаҳрида 16 қаватли бинодан иборат IT-парк филиали. Умумий майдони 14 минг 792 метр квадрат бўлган мазкур бинода IT-марказ, киберспорт, робототехника, IT-лабораториялар, конференс-заллар, ўқув хоналари, коворкинг марказлари ва офис бинолари жойлашган.

Қорақалпоғистондан 29 йил аввал кўчиб кетган Луиза Ўринбетованинг айтишича, мамлакатда жуда катта ўзгаришлар бўлган.

Қорақалпоғистонда яшаб кейинчалик Қозоғистон ва Россияга кўчиб кетганларни меҳмонга таклиф қилишди. Буни эшитибоқ хурсанд бўлиб келдик. Мамлакат жуда ривожланиб кетибди. Ростдан ҳам биз бугун Янги Қорақалпоғистонни кўрдик!, дейди Луиза Ўринбетова.

Нукус шаҳрида Гиннес рекордлари китобига киритилган  “Оқ қуш” мажмуасида барпо этилган дунёдаги энг катта диаметрли қорақалпоқ халқининг миллий қора уйи (ўтов) меҳмонларда илиқ таассурот қолдирди. Мазкур ўтовнинг диаметри 40,5 метрдан иборат.

Қозоғистон республикаси Атрау шаҳри Эдил Жайиқ қорақалпоқ этномаданий маркази раҳбари Пишенбаев Жеткербай ҳам ўз фикрларини билдирди.

Қорақалпоғистондан кўчиб кетганимга 20 йил бўлди. Охирги марта 4 йил аввал келгандим. Бу ерда катта ўзгаришлар бўлганига гувоҳ бўляпман. Бизнинг назаримизда ривожланишда энг орқада деб ҳисоблаб юрган Тахтакўпир тумани ўзгариб кетибди. Бу ерда дам олиш масканлари қурилгани, йўллар ва боғлар бунёд этилгани мени қувонтирди.

Қораўзак, Чимбой туманларида ҳам катта ўзгаришлар бўлганига гувоҳ бўлдик. Нукус шаҳрида кўп қаватли уйлар қурилибди. Тўрт йил аввал келганимда йўқ эди. Булар президент Шавкат Мирзиёевнинг Қорқалпоғистонга бўлган алоҳида эътибори деб ўйлайман, дейди Пишенбаев Жеткербай.

Уч кунлик саёҳат даврида меҳмонлар “Султон Увайс Қароний” мажмуаси, “Тупроққалъа” ёдгорлиги, Тўдакўл соҳили ва Мўйноқ туманига ташриф буюрди.