Американинг Amazon компанияси дунёнинг энг қиммат брендлари рейтингида ўтган йилги етакчи — Apple’ни ортда қолдириб, биринчи ўринни эгаллади. Бу ҳақда Британиянинг Brand Finance консалтинг компаниясининг тадқиқотига таяниб, «ТАСС» хабар берди.
«Amazon’нинг бренд қиймати 2022 йилда 15 фоизга яъни 350,3 миллиард доллардан 299,3 миллиард долларга тушиб кетганига қарамай, етакчиликни қўлга киритди», — дейилади ҳужжатда.
Аниқлик киритилишича, «бренд кучи» кўрсаткичи қийматининг пасайиши 41,2 миллиард долларни ташкил этган. Корпорация бренди «ташқи омилларнинг ўзгариши» туфайли яна 13,7 миллиард доллар йўқотган. Бироқ компаниянинг тижорат кўрсаткичи ижобий бўлиб чиқди ва 3,9 млрд долларга йўқотишларни бироз қоплади.
«COVID-19 дан кейинги даврда истеъмолчилар Америка компаниясининг мижозларга хизмат кўрсатиш даражасини танқид қилган», — дейди Brand Finance экспертлари.
Бундан ташқари, компания буюртма қилинган маҳсулотларни етказиб бериш муддатини оширган. Бу чакана сотувчи мижозларнинг ўз хизматларини бошқа одамларга тавсия этиш истагининг пасайишига олиб келди.
Шунингдек, дунёда коронавирус чекловларининг олиб ташланиши офлайн харидларнинг машҳурлигини тиклади, бу ҳам Amazon хизматларига талабнинг бироз пасайишига олиб келди.
Brand Finance таҳлилчилари, шунингдек, iPhone серияли смартфонлари ва iOS операцион тизимида ишловчи бошқа қурилмалари билан машҳур бўлган ўтган йилги етакчи Apple компаниясининг бренд қиймати ҳисобот даврида 16 фоизга, яъни 355,1 дан 297,6 миллиард долларга камайганига ҳам аниқлик киритди.
Америка корпорацияси Apple рейтингда иккинчи ўринни эгаллади. Бунга компаниянинг етказиб бериш занжири узилиши ва меҳнат бозоридаги тақчиллик билан боғлиқ прогноз қилинган даромадининг камайиши сабаб бўлди.
Бу британиялик экспертларнинг фикрича, Apple’нинг асосий маҳсулотларини ишлаб чиқариш имкониятини чеклайди.
Brand Finance методологиясига кўра, «бренд кучи» компаниянинг маркетинг, ўз капитали ва бизнес самарадорлигига инвестицияларни баҳолашни ўз ичига олган мувозанатли кўрсаткичлар картаси ёрдамида ҳисобланади.
Мавзуга доир: Apple қаторасига ўнинчи марта етакчи: Дунёдаги энг қиммат брендлар эълон қилинди
Изоҳ (0)