iOS операцион тизимининг 8-версиясини юклаб олиш мумкин бўлди

17 сентябрь куни Apple мобил қурилмалари учун мўлжалланган операцион тизимнинг янги версияси – iOS 8’ни расман фойдаланиш учун топширди. Бу ҳақда The Verge маълумотига асосланиб «Пароль» нашри хабар берди.

Янги iOS 8 версияси iPhone 4s, iPhone 5, iPhone 5s, iPad 2, iPad 3, iPad 4, iPad Air, iPad mini, Retina дисплейли iPad mini ва iPod touch’нинг бешинчи авлоди учун мўлжалланган.

Фойдаланувчилар iOS 8’ни қурилманинг созлашлар бўлими ёки iTunes’нинг сўнгги версиясидан юклаб олишлари мумкин. Янги iOS версияси 1,4 Гб ҳажмда бўлиб, уни ўрнатиш учун iPhone хотирасида 5,7 Гб, iPad хотирасида эса 6,9 Гб бўш жой бўлиши зарур.

iOS 8’да янги HealthKit – соғлик ва фитнес дастурлари маркази, Family Sharing – iTunes, iBooks ва App Store’дан қилинган харидларини оила аъзолари билан бўлишиш, гуруҳ бўлиб хабарлашиш функциялари бор.

Шунингдек, iOS 8’да янада яхшироқ кўринишдаги билдиришномалар, Spotlight – дастурлар орасида излаш функцияси ва бошқа янгиликлар мавжуд.