Apple компанияси ўзининг «ақлли» соатлари учун янгиланган дастурий таъминот — watchOS 6.2.8’ни тақдим этди, деб хабар беради IXBT.
Янгиланган дастурий таъминотдан рақамли автомобиллар калити Car Key’ни қўллаб-қувватлаш функцияси ўрин олган. Бу турдаги функция iPhone моделлари учун 17 июль куни тақдим этилган iOS 13.6’да ҳам ишга тушган. Car Key функцияси ёрдамида автомобилларни NFC ёрдамида очиш, двигателни ўт олдириш, юкхона ва эшикларни бошқариш, шунингдек, калитни яна бошқа беш киши билан «бўлишиш» мумкин.
BMW мазкур йўналишда Apple’нинг илк ҳамкорларидан бирига айланган. Функция 2020 йилнинг 1 июлидан сўнг ишлаб чиқарилган 1, 2, 3, 4, 5, 6, 8, Х5, Х6, Х7, Х5М, Х6М ва Z4 моделларида қўллаб-қувватланади. Шунингдек, Apple Watch Series 5 соатлари линейкасида ҳам ушбу функция мавжуд.
Бундан ташқари, watchOS 6.2.8’да Бразилия, Баҳрайн ва Жанубий Африка каби минтақалар учун ЭКГ (электрокардиография) функцияси ҳам фаоллаштирилган.
Аввалроқ iPhone паспорт ва ҳайдовчилик гувоҳномаси ўрнини эгаллаши, янги BMW моделларини iPhone ёрдамида очиш мумкин бўлиши ҳақида хабар берилганди.
Изоҳ (0)