Mudofaa vazirligining Qishloq xo‘jaligi mahsulotlarini yetkazib berish xizmati, Toshkent harbiy okrugi qo‘shinlari qo‘mondonligi hamda 71201-harbiy qism mas’ullari dehqonga bergan va’dasidan tonib, u bilan tuzilgan shartnoma shartlarini bajarmadi. Bu haqda “Daryo”ga murojaat qilgan fermer va dehqon Chori Shoyimov gapirib berdi.
2020-yilda Mudofaa vazirligiga qarashli harbiy poligondan 1940 gektar yer maydonini sheriklik asosida ijaraga olganman. Prezident qarori bilan bo‘sh yotgan yerlardan unumli foydalanish imkoniyati yo‘lga qo‘yildi va chorvachilik, dehqonchilikka berila boshlandi. Ayni maqsadda shuncha yerni olib, lizingga 2 milliard so‘mga yaqin mablag‘ga texnika sotib oldik. Ishga tushirilmagan yerni ekinga tayyorladik. O‘zlashtirdik, deydi murojaatchi Chori Shoyimov.
Dehqonning aytishicha, u Mudofaa vazirligi mas’ullari bilan 2020-yil 22-iyun kuni 9-sonli shartnoma tuzib, lalmi yerlarga bug‘doy, arpa, no‘xat, masxar kabi ekinlarni ekib kelgan.
Bu yerlar suv ichmaydigan lalmi yerlar bo‘lgani uchun Jizzax va Qashqadaryo viloyatlaridan lalmi yerda o‘suvchi bug‘doy, arpa, no‘xat kabi ekinlarni olib kelib ekdik. Uch yil davomida yerdan daromad olish barobarida ijara shartnomaga ko‘ra, daromadning uchdan bir qismini Mudofaa vazirligiga topshirib keldik. Shartnomada nima ko‘rsatilgan bo‘lsa, to‘liq bajardik, deydi murojaatchi.
Murojaatchining aytishicha, 2022-yilning noyabr oyida Mudofaa vazirligi mas’ullari, aynan Murod Xudoyberganov boshchiligidagi xodimlar fuqaroning 500 bosh qoramolini qamab qo‘yib, yerdan chiqib ketishni talab qilgan.
2022-yilning noyabr oylarida 500 bosh chorvamni qamab qo‘yib, bu yerdan meni majburlab chiqarib yuborishdi. Va bu yerlarni New platinum construction deb nomlangan korxonaga berib yubordi. Aslida 2020-yil 22-iyunda tuzilgan shartnomamning muddati 2035-yilgacha bo‘lishiga qaramasdan ular yerni olib qo‘ydi. Agar qo‘shimcha shartlari bo‘lganda va ularning talabi qonuniy bo‘lganda meni muzokara stoliga chaqirishlari kerak edi. Men shu paytgacha aytilgan topshiriqni bajarib, nafaqat o‘zim daromad qildim, vazirlikka ham ulush berib keldim. Buni tasdiqlovchi hujjatlarim bor, deydi shikoyatchi.
“Shayimov Qarshi” xususiy korxonasi rahbarining aytishicha, harbiylar va’dasidan qaytgach, u sudga shikoyat qilgan. Chirchiq tumanlararo iqtisodiy sudi 2024-yilning 14-mart kuni mazkur muammoni ko‘rib chiqib, da’vogar Chori Shoyimov talabini to‘liq qanoatlantirgan. Shuningdek, javobgarlar — 71201 harbiy qism, New platinum construction MCHJ, Toshkent harbiy okrugi qo‘shinlari qo‘mondonligi, Mudofaa vazirligi Qishloq xo‘jaligi mahsulotlarini yetkazib berish xizmatiga dehqonning 2020-yil 22-iyunda tuzilgan 9-sonli shartnomadan to‘laqonli foydalanishga to‘sqinlik qilmaslik majburiyatini yuklagan. 71201 harbiy qism hisobidan da’vogar foydasiga 1 million 700 ming so‘m davlat boji va 34 ming so‘m pochta xarajatini undirishni belgilagan. Biroq ayni kungacha mazkur qarori ijrosi ta’minlanmagan.
“Daryo” murojaatchining birgina da’vosini olib chiqdi. Boisi Mudofaa vazirligiga qilingan jurnalistik so‘rovga vazirlik axborot xizmati hozircha tayinli javob bermadi. Mas’ullar mazkur muammo yuzasidan 27-oktyabrdagi saylovlar o‘tgach, batafsil ma’lumot berishini qo‘shimcha qildi. Shu sababdan “Daryo” ushbu mavzuga yana qaytadi.
Izoh (0)