“Браво” кулги жамоаси аъзоси Отабек Мирзахолов YouTube’даги “Daryo Lifestyle” каналига берган интервьюсида бу концертдаги сўнгги иштироки эканлигини маълум қилди.
— Бу дунёда ҳар нарсанинг ўз вақт соати бор. Бир ақлли инсон: “Агар ишинг энг севимли ҳоббийинг бўлса, демак, сен бахтлисан” деган экан. “Қувноқлар ва зукколар”га кириб келганимга 18 йил бўлибди. Ўшанда эндигина 20 ёшни қаршилаган, талаба йигит эдим. Улғайдим, оилали бўлдим, олти фарзанднинг отасига айландим. Аммо ҳаётим фақат саҳна билан боғланиб қолишини истамайман. Сир эмас, битта концерт учун жуда кўп энергия ва вақт сарфлаймиз. Аммо кун келиб, афсусланиб қолмаслигим учун саҳнадан ташқарида қиладиган ишларим ҳам бор. Бу қарорни қачондир қабул қилишим керак эди.
Онам “Нега бундай деяпсан, севимли ишинг-ку”, деди. Тўғри, саҳнани яхши кўраман, аммо барибир шундай қилишим керак. Бу қарорим бирдан пайдо ўлгани йўқ, бу ҳақда жуда узоқ ўйладим. Ҳар ҳолда 18 йил оз муддат эмас, “Браво”га ишонадиган мухлисларни орттириш учун кўп ҳаракат қилдик.
“Браво”дан кетганимдан кейин асосий эътиборимни кинофильмлар яратиш ва телевидениедаги фаолиятимга қаратмоқчиман, дейди Отабек Мирзахолов.
“Сиз кетгандан кейин жамоа заифланиб қолмасмикан?” деган саволга комик актёр қуйидагича жавоб берди.
— Ёшлар қабул қилиняпти, улар кетганларнинг ўринни тўлдиришига ишонаман. Бундан ташқари, жамоадан кетганимдан кейин ҳам саҳнадан ташқарида қандайдир ёрдам керак бўлса тайёрман. Агар жамоада бир-икки киши ижод қилиб, қолганлар шунчаки рол ижро этадиган бўлса, битта аъзонинг кетиши ҳам яққол сезилиб қолади. Шукрки, бизда ҳамма ижодкор, кимдир сценарий ёзиб бермайди.
2007 йилдан бери катта саҳнага чиқаётган бўлсам, унда чарчоқни эмас, завқни ҳис қиламан. У қанчалик мароқли бўлмасин, ўз вақтида кетишни ҳам билиш керак. “Давринг келганида даврингни сур, давринг тугамасидан даврадан сур”, дейишганидек обрўйим борида саҳнадан кетмоқчиман.
Ўлгандан кейин қабр тепасига бориб “Мен сени яхши кўрардим, сен кераксан. Ёнимда бўлишингни истаяпман” дегандан кўра шу гапларни ўша инсон тириклигида айтиш керак. Айтмоқчи бўлганим: ишдан ташқари ҳаётлигимизда эътибор қаратишимиз керак бўлган жуда кўп яқинларимиз бор. Ҳаётимда туб бурилиш ясашим керак бўлган дамга келдим. “Саҳнадан кетсам, кейинги ҳаётим нима бўлади?”, деган хавотир умуман йўқ. Энди бор эътиборимни оиламга қаратмоқчиман, дейди Отабек Мирзахолов.
Видеони тўлиқ ҳолда томоша қилишингизни тавсия қиламиз.
Изоҳ (0)