Кўплаб хит қўшиқлар муаллифи, хонанда Жалолиддин Аҳмадалиев 29 майдан 1 июнга қадар “Халқлар дўстлиги” санъат саройида “Биз ҳам бир яшасак майлими?” деб номланган навбатдаги концерт дастурини тақдим этмоқда. “Дарё” мухбирлари концертга ташриф буюриб, видео ва фоторепортаж тайёрлади.

Жалолиддин Аҳмадалиев концерт дастурини тўлиқ жонли ижрода мухлисларига тақдим этади. Хонанда бу йилги концерт дастури давомида ижодидаги хит даражасига чиққан тароналарни ва шунингдек янги ижод намуналарини куйлади.

Концерт дастури хонанданинг “19 йил” таронаси билан бошланди. Дастурга “Браво” кулги жамоаси аъзоси Умид Умаров, Жамшид Норматов ҳамда “Максимум” кулги жамоаси вакили Ойбек Тешабоев бошловчилик қилди. Жалолиддин Аҳмадалиев концерт дастури давомида мухлислари билан мулоқот қилиб, тароналарини улар билан бирга ижро этди.

“Концерт бошланишидан олдин ҳеч нарсани ўйламаяпман. Ҳаяжон бор, таваккал қилган инсонмиз. Рэпертуар тузишда мухлисларни зериктириб қўймасликка эътибор қаратдим. Мавзу жиҳатдан доимий мавзуларга мурожаат қилдим. Жонли ижрода куйлашда ҳеч қандай қийинчиликка дуч келмаганман, ҳаммаси жойида”, — дейди Жалолиддин Аҳмадалиев.

“Жалолиддин Аҳмадалиевнинг ижодига битта менинг эмас, бошқаларнинг ҳам муносабати ижобий. Яхши инсон, яхши ижод қиляпти. Ижоди халққа манзур бўляпти, шунинг учун “Халқлар дўстлиги” санъат саройида тўрт кун жонли ижрода концерт беряпти. Ўтган йили ҳам унинг концерт дастурига бошловчилик қилгандим, бу йил ҳам ўзи таклиф билан чиқди, эшитиб хурсанд бўлдим. Жалолиддиннинг мен билган яхши томони — камтарлиги. Қўшиқларида маъно бор, эшитиб маза қиляпман. Ҳурмат қиламан”, — дейди “Браво” кулги жамоаси аъзоси Умид Умаров.

“Жалолиддин Аҳмадалиев йил хитлари, йил хонандаси, йил ижрочиси эътирофига сазовор бўлди. Бунинг тагида катта меҳнат ётибди. Унга “Халқлар дўстлиги” санъат саройининг ижарасига 50 фоиз чегирма қилиб беришди, бунга сабаб эса хонанданинг жонли ижрода куйлаши. Жалолиддиннинг концертига таклиф этилганимдан хурсандман, унинг ижодига омад тилайман”, — дейди қизиқчи Жамшид Норматов.

Хонанданинг бу концерти ҳам бошқа дастурлардан фарқли равишда режиссёр, гримёр, раққоса ва бек-вокал ижрочиларисиз ўтди. Одатда хонандалар концертларида раққосалар қўшиққа мос рақсларга тушишини исташади. Албатта, бу концертнинг томошабоплигини оширади. Аммо  ёш хонанда Жалолиддин Аҳмадалиевнинг концерти буларсиз ҳам файзли бўлди.

Концертдан батафсил репортажни қуйида томоша қилишингиз мумкин.