Ўзбекистонда автомобиль йўллари, шаҳарлар ва бошқа аҳоли пунктлари кўчалари ҳолатини яхшилаш чоралари кўрилади. Бу ҳақда “Ўзбекистон–2030” стратегиясининг барқарор иқтисодий ўсиш орқали аҳоли фаровонлигини таъминлаш йўналиши бўйича 2024 йилга мўлжалланган амалий тадбирлар режасида белгиланган.
Унга кўра, Қорақалпоғистон Республикаси ва вилоятлардаги 2,7 минг километрдан ортиқ умумий фойдаланишдаги автомобиль йўлларини таъмирлаш режалаштирилган. Ҳудудлардаги 10 минг километрдан ортиқ шаҳарлар ва бошқа аҳоли пунктлари кўчалари таъмирланади. Шунингдек, таъмирталаб 110 та кўприк иншоотлари тикланади.
Буларнинг барчаси учун харажатлар Автомобиль йўлларини ривожлантириш мақсадли жамғармаси маблағлари ҳисобидан амалга оширилади.
Бундан ташқари, автомобиль йўлларида транспорт воситалари ва пиёдалар хавфсиз ҳаракатини таъминлаш бўйича қўшимча чора-тадбирлар амалга оширилади.
Яъни, Тошкент шаҳри ва вилоятлар марказларида тажриба-синов тариқасида пиёдалар ўтиш йўлакларига замонавий ёритгичлар ўрнатилади. Аҳоли пунктларида пиёдалар ҳаракатланиши учун 150 километр пиёдалар йўлаклари барпо этилади. 150 дан ортиқ светофор объектлари қурилиб, мавжудлари реконструкция қилинади.
Автомобиль йўлларида 37 мингдан ортиқ йўл белгилари ўрнатилади.
Изоҳ (0)