Тошкент шаҳар ИИББ ЖХХ ЙҲХБ бошлиғи Рафиқжон Жалилов пойтахт аҳолисига мурожаат билан чиқиб, йўл ҳаракати иштирокчиларини қоидаларга қатъий риоя этиш ва ҳушёрликка чақирди.
Унинг таъкидлашича, бугунги кунда пиёдалар ҳаракатланиши учун қулай шарт-шароитлар яратилишига қарамасдан, йўлларда ҳанузгача оғир оқибатли йўл-транспорт ҳодисалари содир этилмоқда.
Хусусан, 2023 йилнинг 9 ойи давомида пойтахтда пиёдалар билан боғлиқ 539 та ЙТҲ содир этилган бўлиб, унда 566 нафар пиёда тан жароҳати олган. Уларнинг аксарияти пиёдалар белгиланмаган жойлардан ва светофорнинг тақиқланган чироғида ўтиш пайтида содир этилган.
“Шунинг учун ҳурматли пиёдалар, сизларни алоҳида ажратилган йўлаклардан, тротуарлардан, улар бўлмаганда эса йўлнинг бир четидан, оқимга қарама-қарши ҳаракатланишга чақирамиз. Йўлни кесиб ўтаётганда эътиборингизни чалғитманг”, — дейди ЙҲХБ бошлиғи.
Рафиқжон Жалиловнинг билдиришича, 17 октябрдан бошланган “Диққат пиёда” кенг қамровли профилактика тадбирига 100 дан ортиқ ходимлар ва жамоатчилик вакиллари жалб этилди.
Тадбир бошидан йўл ҳаракати қоидаларини бузган 5 мингдан ортиқ пиёда аниқланиб, маъмурий жавобгарликка тортилди. Ҳайдовчилар томонидан пиёдаларга йўл бермаслик оқибатида 100 га яқин ҳолатлар аниқланиб, маъмурий баённома расмийлаштирилди.
Шу сабабли Рафиқжон Жалилов ҳайдовчиларни ҳам огоҳликка чақирди.
“Ҳурматли йўл ҳаракати иштирокчилари, Тошкент шаҳар ЙҲХХ шахсий таркиби сизларни ҳушёрликка чақиради. Илтимос, йўллардан ҳаракатланиш вақтида ўзингиз ҳамда ўзгаларнинг хавфсизлигига бефарқ бўлманг. Йўл ҳаракати қоидаларига риоя қилинг”, — деди Рафиқжон Жалилов ўз мурожаатида.
Эслатиб ўтамиз, Тошкентдаги “Чорсу” бозори атрофида ўтказилган тадбирда кўплаб фуқаролар пиёдалар ўтиш йўлида светофор чироқларига амал қилса-да, лекин телефонда гаплашиб ёки қулоқчин таққан ҳолда ҳаракатланаётгани маълум бўлганди.
Маъмурий жавобгарлик тўғрисидаги кодекснинг 138-моддасига кўра, пиёдалар ўтиш жойида ҳаракатланаётганда телефондан фойдаланиши, китоб ёки даврий нашрларни ўқиши, видеоматериал томоша қилиши ҳамда аудиоматериал эшитиши, шунингдек, эътиборни чалғитадиган бошқа электрон воситалардан фойдаланиши БҲМнинг учдан бир қисми (110 минг сўм) миқдорида жарима солишга сабаб бўлади.
Пиёдаларнинг йўлнинг ҳаракат қисмини белгиланмаган жойлардан кесиб ўтиши ҳам шунча миқдорда жарима солишга сабаб бўлади.
Изоҳ (0)