Пойтахтдаги одамлар кўп ҳаракатланадиган чорраҳа ва бозорлар атрофида 24 октябрь куни пиёдалар билан боғлиқ йўл-транспорт ҳодисаларининг олдини олиш мақсадида Тошкент шаҳар ЙҲХБ томонидан “Диққат, пиёда!” тадбири ўтказилди. Бу ҳақда “Дарё” мухбири хабар берди.
“Чорсу” бозори атрофида ўтказилган тадбирда шу нарса маълум бўлдики, кўплаб фуқаролар пиёдалар ўтиш йўлида светофор чироқларига амал қилса-да, лекин телефонда гаплашиб ёки қулоқчин таққан ҳолда ҳаракатланмоқда.
“Хизмат вақтимизда пиёдалар ўзларига мўлжалланган йўлакда, яшил чироқда ҳаракатланмоқда. Лекин ҳаракат вақтида телефон ва қулоқчиндан фойдаланмоқда. Бу бўйича улар билан суҳбатланганимизда “бу мумкин эмаслигини билмасдик”, деб ўзларини оқлашга ҳаракат қилишди”, — деди Тошкент шаҳар ЙҲХБ ходими Ҳусниддин Ўрозов.
Маъмурий жавобгарлик тўғрисидаги кодексининг 138-моддасига кўра, пиёдалар ўтиш жойида ҳаракатланаётганда телефондан фойдаланиши, китоб ёки даврий нашрларни ўқиши, видеоматериал томоша қилиши ҳамда аудиоматериал эшитиши, шунингдек, эътиборни чалғитадиган бошқа электрон воситалардан фойдаланиши — базавий ҳисоблаш миқдорининг учдан бир қисми (110 минг сўм) миқдорида жарима солишга сабаб бўлади.
Ҳусниддин Ўрозовнинг қўшимча қилишича, энг кўп бузилаётган қоидабузарликлардан бири — пиёдаларнинг белгиланмаган жойлардан ҳаракатланиши.
Қонунчиликка кўра, пиёдаларнинг йўлнинг ҳаракат қисмини белгиланмаган жойлардан кесиб ўтиши базавий ҳисоблаш миқдорининг учдан бир қисми (110 минг сўм) миқдорида жарима солишга сабаб бўлади.
Изоҳ (0)