Ўзбекистон Парламентлараро Иттифоқнинг 2021 йилги «Сиёсатдаги аёллар» жаҳон рейтингида 45-ўринни эгаллади, деб хабар бермоқда UzNews. Рейтингда аёлларнинг турли мамлакатлар парламенти ва ҳукуматидаги вакиллиги ҳақидаги маълумотлар кўрсатилган.
Ўзбекистон бу борада 130 дан ортиқ давлатлар, жумладан, Германия, Австралия, Канада, АҚШ, Марказий Осиёнинг барча давлатлари ва бошқаларни ортда қолдирди.
Бундан ташқари, Ўзбекистон аёллар парламентни бошқарадиган ва ҳукумат таркибига кирадиган мамлакатлар рўйхатига киритилган. Шунингдек Сенат раиси Танзила Норбоева раҳбарлик қилаётган Гендер тенгликни таъминлаш масалалари бўйича комиссия ишига юқори баҳо берилган.
1889 йилда ташкил этилган Парламентлараро Иттифоқ 179 мамлакат парламентларини бирлаштирган парламентлараро мулоқот учун энг катта платформадир. Ташкилотда, шунингдек, минтақавий парламент органларининг 13 та ассоциацияланган аъзолари мавжуд.
Ўз навбатида Ўзбекистон ҳам 1992 йилдан Парламентлараро Иттифоқ аъзоси ҳисобланади. Гарчи мамлакатнинг аъзолиги 2007—2017 йилларда тўхтатилган бўлса-да, 2017 йилда Тошкент Парламентлараро иттифоқдаги иштирокини яна тиклади.
2019 йил октябрь ойида Олий Мажлис Қонунчилик палатаси спикерининг биринчи ўринбосари Акмал Саидов 2020—2022 йилларга Парламентлараро Иттифоқнинг Евросиё гуруҳидан Парламентлараро Иттифоқнинг ижроқўми аъзоси этиб сайланган эди. 2020 йил 30 январь куни Парламентлараро Иттифоқ ижроия қўмитаси бошқарув органлари янги таркибини шакллантириш доирасида ПAI вице-президенти ҳамда молия бўйича кичик қўмита аъзоси этиб ҳам тайинланди.
Изоҳ (0)