Нуфузли халқаро ташкилотлар пандемия даврида айнан хотин-қизлар кўпроқ азият чекканини маълум қилган. Бу ҳақда Сенат раиси Танзила Норбоева Тошкент шаҳрида бўлиб ўтаётган Парламентлараро иттифоққа аъзо давлатлар парламентлари аёл раҳбарларининг 14-саммитида айтиб ўтди.
Танзила Норбоева саммитда пандемияда юзага келган жиддий ижтимоий ва иқтисодий инқирозларни бартараф этиш муҳим масала эканини таъкидлади.
Нуфузли халқаро ташкилотларнинг маълумотларига кўра, пандемия даврида айнан хотин-қизлар кўпроқ азият чеккан. Жумладан, меҳнат бозорида фаолият юритаётган аёлларнинг 5 фоизи ишсиз қолди. Оилаларда юзага келган мураккаб вазият ортидан хотин-қизларга нисбатан зўравонлик ҳолатлари кўпайди. Уларнинг ижтимоий ва иқтисодий ҳолати кескин ёмонлашиши оқибатида жиноятчилик ҳамда ҳуқуқбузарликлар сони ортди.Маълум қилинишича, Тошкент саммитида БМТ, Парламентлараро иттифоқ, Европада Хавфсизлик ва Ҳамкорлик Ташкилоти Парламент Ассамблеяси каби халқаро ташкилотлар раҳбарлари, 19 та давлатдан 120 дан ортиқ парламент вакиллари иштирок этмоқда.Мана шундай оғир бир шароитда халқаро хамжамиятнинг биргаликдаги саъй-харакатлари, бир-бирига хайрихоҳлиги натижасида вазият анча яхшиланди. Бироқ, пандемия ҳали давом этаётган, унинг асоратлари буткул барҳам топмаган бир шароитда бу борада қўшма лойиҳаларни амалга ошириш ва қонунчилик, халқаро стандартлар ва нормаларни янада такомиллаштириш давр талаби бўлиб қолмоқда.
Шундан келиб чиққан ҳолда, бугунги саммитда пандемия оқибатида юзага келган жиддий ижтимоий ва иқтисодий инқирозларни, хусусан, янги хавф-хатарларни бартараф этиш бўйича конструктив таклифлар ишлаб чиқиш, уларни биргаликда амалга ошириш бўйича таъсирчан чора-тадбирларни белгилаб олишни олдимизга мақсад қилиб қўйганмиз.
Танзила Норбоева, Сенат раиси.
Изоҳ (0)