Ижтимоий тармоқда “Ўзбекистон” санаторийлари (Украина, Ялта шаҳри – Россия, Кисловодск шаҳри) фаолиятини қайта тиклаш ва модернизациялаш жамоат фонди (кейинги ўринларда – Жамоат фонди) сенатор Одилжон Иминовга тегишли бўлиши мумкинлиги ва шундай бўлган тақдирда бу “Ўзбекистон Республикаси Олий Мажлиси Қонунчилик палатаси депутатининг ва Сенати аъзосининг мақоми тўғрисида”ги қонунига кўра сенаторнинг ваколатлари муддатидан илгари тугатилишига сабаб бўлиши баён этилган.
Мазкур хабарлар юзасидан Сенат ахборот хизмати “Daryo.uz”га изоҳ берди. Айтилишича, Жамоат фонди 2008 йилда ташкил этилган (2010 йилда қайта ташкил этилган) ҳамда Адлия вазирлиги томонидан рўйхатга олинган. 2008 – 2018 йиллар давомида Одилжон Иминов ушбу Жамоат фондига раҳбарлик қилиб келган.
Марказий сайлов комиссиясининг 2018 йил 27 мартдаги 868-сонли қарори билан Одилжон Иминов Олий Мажлиси Сенати аъзоси этиб рўйхатга олинган. Шундан сўнг, у Сенатнинг Бюджет ва иқтисодий ислоҳотлар масалалари қўмитаси раисининг ўринбосари этиб сайланган.
Қайд этиш жоизки, Сенатда доимий асосда ишловчи сенатор ўз ваколатлари даврида илмий, ижодий ва педагогик фаолиятдан ташқари ҳақ тўланадиган бошқа турдаги фаолият билан шуғулланиши мумкин эмаслиги назарда тутилган.
Шунга асосан Жамоат фонди раҳбарининг 2018 йил 30 мартдаги 5-сонли буйруғига асосан Одилжон Иминов 2018 йил 2 апрелдан бошлаб Сенат аъзолиги даврида жамоатчилик асосида (маошсиз) ишлашга ўтказилган. Унинг вазифалари эса директор ўринбосари зиммасига юклатилган.
Ушбу буйруққа асосан Одилжон Иминов бугунги кунга қадар Жамоат фондида жамоатчилик асосида фаолият юритиб келмоқда, дейилади Сенат ахборотида.
Маълумот учун, Сенатда доимий асосда ишловчи сенатор ҳақ тўланадиган тегишли турдаги фаолият билан шуғулланишга йўл қўйилмаслиги тўғрисида огоҳлантириш олганидан кейин ҳақ тўланадиган бошқа турдаги фаолият (илмий, ижодий ва педагогик фаолиятдан ташқари) билан шуғулланган тақдирда ваколатлари муддатидан илгари тугатилишига оид норма 2024 йил 2 июлдаги қонунига асосан киритилган.
Изоҳ (0)