Рақобатни ривожлантириш ва истеъмолчилар ҳуқуқларини ҳимоя қилиш қўмитасининг таклифлари асосида купе типидаги вагонларнинг ҳаво совитиш тизими учун тўлов ундирилмасдан, чипта нархидан чегирилган ҳолатда қўлланмоқда. Бу ҳақда қўмита матбуот хизмати хабар берди.
Июль ойининг ўрталарида ўзбек юлдузлари томонидан йўловчи поездларида кондиционер тизими ишламаётгани ҳақидаги хабарлар ижтимоий тармоқларда кенг муҳокамаларга сабаб бўлганди. Қўмита бу ҳолатларни ўрганиш ва аниқлик киритиш бўйича “Ўзтемирйўлйўловчи”га тегишли тартибда сўров юбориб, ҳозирда тегишли ўрганиш ишлари олиб борилаётганини маълум қилганди.
Фуқаролар темирйўл кассаларидан билет сотиб олинган вақтда совитиш тизими хизматлари учун тўлов амалга оширилишига қарамасдан йўловчи поездларида ҳаракатланган вақтда кондиционер ишламагандан норози бўлса, Рақобат қўмитаси ёки “Ўзтемирйўлйўловчи”га мурожаат қилиши мумкин.
Бунда поездларда ҳаракатланган вақтда кондиционер ишламаётганини тасдиқловчи фото ва видео материаллар ҳам илова қилинади.
“Мазкур мурожаатларни ўрганиш давомида маълум бир йўналиш бўйлаб ҳаракатланаётган йўловчи поезд таркибидаги йўловчи вагонининг совитиш тизимлари ишламагани бўйича мурожаатлар ўз тасдиғини топган ҳолларда, мазкур йўловчиларга ҳаво ҳароратини мўтадиллаштириш ва совитиш тизимлари ишламагани учун тегишли миқдордаги пул маблағлари компенсация сифатида қайтариб берилишини маълум қиламиз”, дейилади хабарда.
Шунингдек, Рақобат қўмитаси таклифлари асосида “Ўзбекистон темир йўллари” томонидан 19 июлдан купе типидаги вагонларнинг ҳаво совитиш тизими учун тўлов ундирилмасдан чипта нархидан чегириб қолина бошланди.
Изоҳ (0)