Ҳозирги вақтда визажистлар ҳар хил замонавий технологияларга эга, аммо авваллари гримёрлар керакли образни яратиш учун турли хил усуллардан фойдаланган. Актёрни ёшартириш, қаритиш ёки ташқи қиёфасини ўзгартириш учун махсус лента, елим, бўёқ, қопламалар, ҳатто бензин — қўлларида бор бўлган материалларни ишлатган.
“Аёз бобо”
Настенька роли ёш фигурали учувчи Наталья Седихга насиб қилади, режиссёр Александр Роу қизнинг ижросини телевизорда кўриб қолади. Наталья жуда ёш кўринарди, шунинг учун Роу уни яхшилаб грим қилишларини сўрайди. Қизнинг кўзлари атрофи кўк тен билан чизилади, лаблари эса ёрқин қизил лаб бўёғи билан бўялади.
Музлаган киприк яратиш учун гримёрлар одатда актёрларга соқол ва мўйловларни ёпиштириш учун ишлатиладиган елимдан фойдаланади. Суратга олиш ишлари тугаганидан кейин сунъий киприкдан қутулиш жуда қийин эди. Седих киприкларини қандай юлиб ташлаганини ҳалигача даҳшат билан эслайди.
“Хоттабич”
Хоттабичнинг грими устида рассом Василий Горюнов ишлаган. Айнан у қудратли жин образини яратган ва бунинг учун ҳар куни 2 соат сарфлаган — актёр Николай Волковга ҳар сафар махсус пластилиндан бурун ва лаб ясашга тўғри келади.
“Қўлигул Марья”
Георгий Милляр ўз фаолияти давомида кўплаб эртак қаҳрамонларини экранда жонлантирган. Ёшлигида актёр реквизитлар устаси бўлиб ишлаган, шунинг учун у ҳар доим грим қилиш масаласига масъулият билан ёндашган. Ҳар бир ролдан олдин Милляр гримёрларга осон бўлиши учун қоши ва сочини олдирган.
Аммо бир фильмда Георгий Францевич деярли профессионал гримсиз ишлашига тўғри келади. “Қўлигул Марья”даги Квакки роли учун унинг бошига “зелёнка” суртиб ташланади.
“Лўли”
Актёр Михай Волонтир “Лўли” фильмида суратга тушаётганида бошқа фильмларда ҳам роль ўйнаган. Шунинг учун актёрга улама соч ва соқол ёпиштирилади.
Кекса Будулай образини яратиш учун гримёрлар оқ гримни бензин билан аралаштириб, қаҳрамоннинг жингалак сочларига суртишади. Бензин буғланиб, оқ сочлар пайдо бўлади. Қаҳрамонни қора соч қилиб кўрсатиш керак бўлганда эса сочларга кўмир билан ишлов берилган.
“Буратинонинг саргузаштлари”
Буратино ролини ижро этган Дима Иосифов сохта қош ёпиштириш учун соч ва қошларини қириб ташлашга мажбур бўлади. Ёш актёр учун ҳар бир грим тахминан бир ярим соат давом этади.
Энг кўп муаммо пенопласт бурунни ясашда бўлади. Ҳаммаси бўлиб, суратга олиш пайтида Дима 45 та бурун ишлатади.
Мальвина ролини ўйнаган Таня Проценко учун ҳам осон бўлмайди. Чинни протездан фойдаланиш учун у бир нечта тишидан айрилади. Таня қошларини ҳам қирдириб, оқартиради, унинг юзига ҳар куни оппоқ қилиб пудра суртилган, сунъий киприклар ҳам ёпиштирилган.
“Бальзаминовнинг уйланиши”
Ушбу фильмда 46 ёшли актёр Миша Бальзаминов ролини ўйнаши керак эди, аммо сценарийга кўра унинг қаҳрамони 25 ёшда. Вицин қаҳрамонининг грими жуда мураккаб эди, мазкур грим устида актёрнинг шахсан ўзи ишлайди. Кейинчалик бу фильмни актёрнинг ўзи “Бальзамланганнинг уйланиши” деб атайди.
Ажинларни яшириш учун актёр юзига тўр ва сепкил чизган. Вицин юзини ингичка қилиб кўрсатиш учун шлак ва қизил бўёқдан махсус аралашма тайёрлайди. Образ жингалак парик ва бир оз юқорига кўтарилган бурун билан якунланади — актёр бурнини махсус елим билан ёпиштиради.
“Одам-амфибия”
Фильм ижодкорлари бош қаҳрамонлар Гутиера ва Ихтиандрнинг кўзлари ёрқин кўринишини хоҳлайди. Бунинг учун яшил ва кўк филтрли махсус лампалар ишлатилган - улар актёрлар юзларининг чап ва ўнг томонига ўрнатилган. Қурилмалар кўз тубини ёритиб, ноодатий ранг берган.
“Иван Грозний”
“Иван Грозний” фильми гримёри Василий Горюнов жуда қийин вазифага дуч келади. Тахминан 6 ҳафта давомида у режиссёр ва актёр билан биргаликда ҳаётининг турли босқичларида қиролнинг қиёфасини етказиши керак бўлган 16 та образни ишлаб чиқади. “Грозний”ни ўйнаган Николай Черкасов учун энг қийини биринчи грим бўлади – у 40 ёшли эркакдан 17 ёшли йигитга айланиши керак эди.
Черкасовнинг бурни, қош ва киприклари ёпиштирилган, парик кийдирилган, чаккаларига ва қулоқлари орқасига ҳам ингичка шаффоф ленталар ёпиштирилган. Суратга олишдан олдин ленталар маҳкам тортилиб, бошнинг орқа қисмига боғланган, бу эса ажинлар текисланишига олиб келган. Бироқ иш кунининг охирида ленталар олиб ташлангач, актёрнинг ажинлари аввалгидан ҳам кўпайиб кетган. Николай ҳатто роли туфайли тез қариб қолишдан қўрққан ҳам.
Изоҳ (0)