«Аёз бобо» фильмидаги ёқимтой актриса — Наталья Седихнинг ҳаёти қандай кечди?

Режиссёр Александр Роунинг 1965 йилда премьераси бўлиб ўтган «Аёз бобо» фильми муваффақиятга эришишида ундаги бош қаҳрамон ижрочиси Наталья Седихнинг ҳам ҳиссаси катта. Ўзига хос ижроси ва гўзаллиги билан мухлислар қалбидан жой олган актрисанинг шахсий ҳаёти ва ижоди ҳақида маълумот бериб ўтамиз.

«Аёз бобо» фильмида суратга тушиш давомида атиги 15 ёшда бўлган актриса Москвада ҳарбий оиласида дунёга келган. Рақс тушишга қизиққан қизалоқ спорт мактабига қабул қилинган ва 10 ёшида Совет иттифоқининг чемпионатида бронза медалини қўлга киритган. Фигурали учиш бўйича шуғулланган Наталья балетга ҳам қизиқа бошлайди.

Балерина ва актриса

Москва хореография олийгоҳининг талабаси «Жарима тўпи» картинасида суратга тушишга таклиф қилинади. Унда актриса муз устида чиқиш қилади. Телевизор орқали эфирга узатилган мазкур картина «Аёз бобо» фильмида бош қаҳрамон ролини гавдалантириш учун актриса қидираётган Александр Роунинг эътиборини тортади ва суратга олиш жамоасидан ундаги ёқимтой қизалоқни топишни сўрайди. Шаҳарнинг бир қанча мактаб ва тўгаракларидан қидирилган Седих эртаси куни фильм учун синовда иштирок этади. Кадрда 12 ёшдек кўрингани учун режиссёр пардозчилардан уни каттароқ кўрсатиб пардоз қилишни сўрайди.  Седихнинг суратга тушиши аниқ бўлганда балет мактабидаги машғулотлари қолиб кетишини важ қилиб, ўқитувчилар унинг суратга тушишига қаршилик қила бошлайди. Аммо бу қизга тўсиқ бўла олмайди. «Аёз бобо»нинг премьерасидан кейин Наталья юлдуз бўлиб уйғонади. Бутун Совет Иттифоқида кўрсатилган фильм кейинроқ Венеция кинофестивалида бош совринни қўлга киритади.

Айнан ушбу актрисани бош ролга танлаб олгани учун режиссёр олқишланади, ҳайъат аъзолари агар Рафаэл тирик бўлганида, ушбу актриса унинг илҳом париси бўлиши мумкинлигини таъкидлайди, фильм таниқли режиссёр Стивен Спилбергнинг ҳам эътирофига сабаб бўлади. Шундан кейин бир қанча режиссёрлар Наталья билан ҳамкорлик қилишни орзу қила бошлайди. Аммо у балет мактабидаги машғулотларидан воз кечишни хоҳламайди. Шунга қарамай, кейинроқ у бир қанча лойиҳаларда иштирок этади. «Дон Кихотнинг болалари», «Мовий муз», «Олов, сув ва … мис трубалар» фильми шулар жумласидан.

Кейинроқ актриса барча киностудиялардан унинг суратларини ўчириб ташлашини сўраб, узоқ вақт давомида кинода фаолият юритмайди ва ҳаётини балетга бағишлайди. 90 йилларга келиб кўриниш беришни бошлаган актриса эндиликда унча муҳим бўлмаган ролларни ижро қила бошлайди.

Актрисанинг шахсий ҳаёти

Актриса Катта театр жамоаси билан Ленинградга келганида Виктор Лебедев билан танишади. Викторнинг оиласи борлигига қарамай, 28 яшар Седих ва 41 яшар композитор ўртасида илиқ муносабатлар бошланади. Лебедев актриса учун ажрашганига қарамай, оиласи ва ишини ташлаб Москвага кета олмайди. Наталья ҳам «Катта театр»ни ташлаб кетолмайди.

Фарзандли бўлганидан кейин Викторнинг хиёнати ҳақида хабар топган Наталья уни кечира олмайди. Бугунги кунда Москвада ёлғиз ҳаёт кечирадиган актриса бошқаларга муҳтож ва қарам бўлмасдан яшашга ҳаракат қилишини ва бу жуда ҳам қулайлигини таъкидлайди.