Россияда мамлакат ҳудудига мигрантларни ноқонуний олиб кириш билан шуғулланган икки нафар Ўзбекистон фуқароси қўлга олинди. Бу ҳақда Россия ИИВ ахборот хизмати хабар берди.
Маълум бўлишича, улар Москва шаҳридаги хусусий клиникалар ходимлари билан тил бириктириб, даволаниш учун сохта таклифномалар орқали Марказий Осиё фуқароларини Россияга олиб кириш билан шуғулланган.
«Аэропортлар орқали чегарани кесиб ўтишда мигрантлар мансабдор шахсларга ушбу сохта ҳужжатларни тақдим этган ва мамлакат ҳудудига кириб келган», — дейди ИИВ расмий вакили Ирина Волк.
Бундан ташқари, чегара назорати ходимлари таклифномалар ҳақиқийлигини текширувдан ўтказганида тиббиёт клиникаси ходимлари хориж фуқароларида касаллик борлиги бўйича ёлғон маълумотлар берган. Аслида эса фуқаролар даволаниш эмас, балки ишлаш мақсадида келган.
Мазкур ҳолат бўйича Россия Жиноят кодексининг 322-1-моддаси (ноқонуний миграцияни ташкил этиш) билан жиноят иши қўзғатилган.
«Тезкор-қидирув тадбирлари натижасида ҳуқуқ-тартибот органлари ходимлари тўрт нафар гумонланувчини қўлга олди. Гумонланувчиларнинг икки нафари қонунбузарлик ҳаракатларининг ташкилотчилигида гумонланган ва айни вақтда ҳибсда. Қўлга олинган яна икки нафар фуқаро хусусий тиббий ташкилот ходимлари бўлиб, айбига тўлиқ иқрор бўлган ва тергов билан ҳамкорлик қилмоқда», — дея қўшимча қилади Ирина Волк.
Аввалроқ Москва ҳукумати қурилишларда мигрантлардан бутунлай воз кечишни таъминлайдиган режани тайёрлаши, Ўзбекистон фуқаролари Россияга кирган кундан бошлаб 15 кун ичида рўйхатдан ўтиш заруратидан озод этилиши мумкинлиги тўғрисида хабар берилганди.
Изоҳ (0)