Давлат божхона қўмитасининг Контрабанда ва божхона қонунчилиги бузилишига қарши курашиш бошқармаси ҳамда Наманган вилояти божхона бошқармаси ходимлари айланма йўллар орқали юк машиналарини ноқонуний равишда Ўзбекистонга олиб кириш билан шуғулланиб келган уюшган жиноий гуруҳ фаолиятига чек қўйди. Бу ҳақда Давлат божхона қўмитаси матбуот хизмати хабар берди.
Маълум қилинишича, жиноий гуруҳ аъзолари фуқаролар Н.Б., А.Б., Т.М., И.А. ва А.Ш. Наманган вилояти Янгиқўрғон туманидаги айланма йўл орқали Foton русумли юк автотранспорт воситасини Ўзбекистонга олиб кирган. Гуруҳ ўз жиноий ҳаракатларини давом эттиришда шубҳа уйғотмаслик учун, мазкур транспорт воситасига Ўзбекистонда рўйхатдан ўтган бошқа транспорт воситасининг давлат рақамини таққан.
Шунингдек, автотранспорт воситаси юкхонасидаги шағал остида икки дона юқори кучланишли трансформатор ва эҳтиёт қисмлар ҳам божхона назоратидан яширинча олиб кирилгани аниқланган.
Олиб борилган тезкор қидирув ва суриштирув ишларида маълум бўлишича, жиноий гуруҳ аввал ҳам шу йўл билан яна битта Foton юк машинасини Ўзбекистонга олиб кирган. Наманган шаҳрида сақланаётган мазкур транспорт воситаси шубҳа уйғотмаслиги учун унинг кабинаси «Маз» русумли юк машинасининг кабинасига алмаштириб қўйилган.
Тезкор тадбирлар давомида олиб қўйилган юк машиналари, трансформаторлар ва бошқа товарларнинг умумий қиймати 910 миллион сўмни ташкил қилган. Ҳозирда мазкур ҳолат юзасидан жиноят иши қўзғатилган.
Аввалроқ, Бухорода иккита Howo’ни 965 миллион сўмлик имтиёздан ноқонуний фойдаланиб, Ўзбекистонга олиб киришга уриниш ҳолати аниқланган эди.
Изоҳ (0)