Фарғона вилоятида 292 миллион сўмлик iPhone ва Samsung қўл телефонларининг четдан ноқонуний олиб кирилишига чек қўйилди. Бу ҳақда вилоят божхона бошқармаси хабар берди.
Қайд этилишича, контрабандага қарши курашиш бўлими ходимлари Наманган вилояти божхона бошқармаси ходимлари билан ҳамкорликда тезкор-қидирув тадбирини ўтказган. Тадбир давомида фуқаро бошқарувидаги Nexia русумли автотранспорт воситаси тезкор кузатувга олинган. Ушбу автотранспорт воситаси Наманган шаҳри ҳудудида тўхтаб турган вақтида ушланиб, холислар иштирокида кўздан кечирилган.
Натижада автомашина юкхонасида хорижда ишлаб чиқарилган ва божхона расмийлаштирувидан ўтганини тасдиқловчи ҳужжатлари бўлмаган дастлабки қиймати 292 миллион сўмлик жами 3 турдаги 45 дона iPhone, 9 дона Samsung ва 1 дона LG русумли жами 55 дона қўл телефонлари экани маълум бўлиб, ашёвий далил тариқасида вақтинча сақловга олинган.
Мазкур ҳолат юзасидан терговга қадар текширув ҳаракатлари олиб борилмоқда.
Аввалроқ “Яллама” постида 830 млн сўмлик LED чироқларнинг мамлакатга ноқонуний олиб кирилишига чек қўйилгани тўғрисида хабар берилганди. Шунингдек, Бухорода 15,5 млрд сўмлик пестицидларнинг мамлакатга ноқонуний олиб кирилишининг олди олинган эди.
Изоҳ (0)