Ноодатий образлар ва тўлиқ жонли ижро: хонанда Лола 10 йиллик танаффусдан сўнг “Халқлар дўстлиги”да концерт берди (видео)

Ўз бағрига тўрт минглаб мухлисларни йиғган “Халқлар дўстлиги” санъат саройида узоқ кутилган концерт — мафтункор Лоланинг 20 йиллик ижодий сарҳисоби бўлиб ўтди. Бир неча йиллик ижодий танаффусдан сўнг 27-28-29 сентябрь кунлари Лола тўлақонли жонли ижрода мухлислари билан куйлаб, шоу-концертни уларнинг эътиборига ҳавола қиляпти.

Тўрт қисмдан иборат бўлган шоуда хонанда энг сара ва мухлисларга севимли қўшиқларини куйлади. Энг ҳит тароналарининг умуман янги талқинда ижро этилгани залда йиғилганларнинг тўхтовсиз олқишига сазовор бўлди.

Саҳна декорацияси ва Лоланинг имижи алоҳида мавзу: ноодатийликни хуш кўрувчи хонанда бу сафар ҳам астойдил меҳнат қилгани яққол кўринди. У биринчи қўшиғини саҳнада от устида айтган бўлса, кейинги қисмдаги чиқишида эса “гул барги” ичида куйлади.

Концерт режиссёрининг сўзларига кўра, тўртта машҳур хонанда билан дуэт бўлиши керак эди. Тоҳир Содиқов сафарга кетгани боис концертга боролмаслигини маълум қилган. Шоҳруҳхон ҳамда рэперлар Конста ва Шаҳриёр шоу бошланмасиданоқ келиб, хонандани қўллаб-қувватлади.

 

Шаҳриёр дуэтдошлар орасида биринчилардан бўлиб саҳнага чиқди. У журналистларга берган интервьюсида Лолани ўз опаси каби ҳурмат қилишини айтиб, ижодий парвозлар тилади.

— Эътибор берган бўлсангиз, концепт бўйича концертда Лоланинг энг ҳит қўшиқлари бугун янги талқинда ижро этилади. Бугун “Нетайин” таронамизни ҳам шу услубда тинглашингиз мумкин. Буни тўлақонли янги дуэт деб ҳисобламайман, лекин концерт жуда ажойиб ўтишига аминман.

Рэперларнинг даври бошланяпти, бу жуда қувонарли ҳол. Фурсатдан фойдаланиб, Констага ҳам омад тилайман, у жуда истеъдодли ижодкор. Эсласангиз, “Нетайин”  қўшиғи чиққанида ҳали Ўзбекистонда рэперлар кам, реп йўналиши ҳам унча ривожланмаган эди. Қўшиқда “Бахт, бахт, яна қандай бахт” деган жойлари реп бўлганди. Шу сабабли ҳам бугунги концертда шу қўшиқни танладик.

Лоланинг ҳар бир асари кўнгилга яқин, мухлис сифатида “Тошкент, Самарқанд” таронасини яхши кўриб эшитаман, самарқандлик бўлганим учун (кулиб). Худо хоҳласа, ўзим 2025 йил баҳорда яккахон концертимни беришни режалаштиряпман.

“Беном” гуруҳи аъзолари шоу-концертга бош мусиқий продюсер бўлиб, Лоланинг жонли ижроси таъминотига масъул бўлди.

— Узоқ йиллик танаффусдан сўнг концерт мавзуси кўтарилганда бизга мусиқий бош продюсер бўлишни таклиф қилди. Мана, бугун жонли ижро таъминоти, созандалар билан ишлаш бизнинг бўйнимизда. Лола аввал ҳеч кимда бўлмаган концерт беришни хоҳлади. Керак бўлса, хорижлик мутахассисларни таклиф қиламан, деди ва кўриб турганингиздек, концерт режиссёри, декорация устаси ва балетмейстер чет эллик. Концерт борасида Лола жуда талабчан, ўзига қўядиган талаби ҳам шунга яраша катта.

Жонли ижрода хавф юқори даражада бўлади, ўйламаган ишларингиз бўлиб кетиши мумкин. Лола ўйланиб жонли ижрода қандай бўларкан, деб турганида қайтага мухлисларга ёқади, мабодо хато кетиб қолса ҳам, улар буни кечиради, деб тушунтирдим. Мажбурлаб кўндирдик, январь ойидаги Лола билан бугунги Лоланинг ер-у осмончалик фарқи бор — у ҳозир ўзига ишонган, йил бошида эса ўзига ишонмаган Лола эди.

Дуэт қилиш режамизда бор эди, лекин жонли ижрода саҳна ортида ўзим бўлишим керак. Шу сабабли дуэтдан воз кечдик, насиб қилса, кейинги концертда бирга куйлаймиз. 10 йиллик танаффусдан сўнг бугун gold collection, яъни олтин ҳитлар — Лоланинг энг севимли тароналари янгича талқинда куйланади.

Рэпер Констанинг чиқиши бутун залда шовқин кўтарди. Мухлислар дуэтнинг ҳар бир жумласини хонандалар билан баравар куйлашди.

— Лола билан дуэт куйлашни узоқ йиллардан бери хоҳлардим, Instagram’да “Жоним соғиндим”ни эшитиб қолганимда хотирамда янгиланди ва шуни ремикс қиламан, дедим. Мусиқаси жуда тез тайёр бўлди ва тасаввуримда қўшиқ деярли пайдо бўлди. Ўзимга қўядиган талабим кучли, “У ҳақида”ни ёзиб бўлганимдан сўнг ўзимга кейингиси ундан-да яхшироқ чиқиши керак, бўлмаса, ижод қилиб нима қиламан дедим, дейди Конста.

Концерт якунида Лола қизи ва ўртанча ўғли билан биргаликда отаси ҳақида қўшиқ куйлади. “Дадажоним, сизни жуда соғиндим. Тушларимда сизни кўрсам дейман” жумлалари мухлислар кўзини ёшга тўлдирди. Унинг сўнгги кунлари ёнида бўлолмагани, карантин сабабли Ўзбекистонга киролмагани ҳақида, у доим концертида олд ўриндиқларда ўтириб, қизини қўллаб-қувватлаб туриши ҳақида эслаб, кўзларига ёш олди. “Сизларни ҳам йиғлатганим учун ҳаммангиздан узр сўрайман, азизларим” деди Лола унинг сўзларидан таъсирланганларга қарата.

— Кутмагандим! Мен жуда хурсандман, мухлислар меҳрини қалбим билан, танамнинг ҳар бир ҳужайраси билан ҳис қилдим. Жамоамга катта раҳмат айтаман, уларсиз бу шоу бўлмасди. Бахтли бўлинглар!