9—10-октябрь кунлари “Халқлар дўстлиги” санъат саройида “Космос” кулги жамоаси ўзининг илк яккахон концерт дастурини тақдим этади. Хўш, тайёргарлик жараёнлари қандай кечяпти? Даврон Кабулов нима мақсадда янги жамоани тузишга қарор қилганди? Актёрлар қандай танланади ва улар Даврон Кабуловнинг “қора рўйхат”ига тушмаслиги учун нималарга эътибор бериши керак. Шу каби саволларга “Космос” жамоасининг бош продюсери Даврон Кабулов жавоб берди.

— 2019 йили “Гараж” номли телелойиҳани ташкил этгандик. Лойиҳа давомида иқтидори ва ижобий қирраларини намоён қилган олти нафар иштирокчини саралаб олгандик. Афсуски, кўп ўтмай уларнинг икки нафари билан хайрлашишимизга тўғри келди. Бу жамоа аслида “Миллион”нинг антрактларини тўлдириш учун ташкил этилганди. Бундан ташқари, авлодлар алмашинувини таъминлаш, ёш истеъдод эгаларига ёрдам беришни ҳам ният қилганмиз. Шу боис 2021 йилдан бошлаб “Космос” йигитлари “Миллион”нинг концертларида иштирок этишни бошлашди. Улар анча олдин концерт беришга тайёр эди. Аммо болани сувга қўйишдан аввал унга сузишни ўргатиш керак. Уч йил давомида улар катта саҳнада тажриба орттирди ва ўз мухлисларига эга бўлди. Турган гапки, илк концертдан фойда олиш қийин. Аммо концерт муваффақиятли ўтишига кўзим етади, — дейди Даврон Кабулов.

Даврон Кабулов тренддаги ҳар қандай мавзуни саҳнага олиб чиқиб бўлмаслиги ва “минг сўм” сўраган болакайнинг санъат саройига чиққанидан ранжигани ҳақида айтиб ўтди.

— Бунда Нодирбек Ҳайитовнинг айби йўқ, унинг атрофидаги инсонлар, хусусан, концерт продюсери бу ҳақда ўйлаши керак эди. Нодирбек Ҳайитов ижоднинг ичида, у кўп нарса ҳақида ўйлайди ва кези келганда нима тўғри, нима нотўғри эканлигини англамай қолиши табиий ҳол. Бу худди дўкондан парфюм олаётганда икки ёки учинчи атирни ҳидлагандан кейин уларни ажратолмай қолгандек гап. Атрофдаги одамлар унга маслаҳат бериши ва ўрни келганида “стоп” қилиш кераклигини айтишлари керак эди. Тренддаги мавзуларни олиб чиққан яхши, аммо бу ўша одамнинг ўзини саҳнага олиб чиқиш керак дегани эмас. Қўпол бўлса-да айтаман, у болакай саҳнада иштонини ечиб юборса, нима қила олишарди?! Шулар ҳақида ҳам ўйлаб кўриш керак, — дейди Даврон Кабулов.

“Миллион” жамоасининг Россиядаги гастрол сафарлари чоғида актриса Нилуфар Ҳамидованинг саҳна либоси кўплаб танқидларга сабаб бўлганди. Хўш, саҳнани қадрлайдиган Даврон Кабулов нега “Миллион”нинг гaстрол сафарида актрисанинг очиқ-сочиқ либосда саҳнага чиқишига ижозат берди?

— Опа Россияга боргандан кейин бизга “сюрприз” кўрсатди? Саҳнага чиққунга қадар бу либоси ҳақида билмагандик. Чунки жамоанинг ҳар бир аъзоси Тошкентдаги концертда кийган кийимлари билан саҳнага чиқди. Опа Тошкентдаги концертда бутунлай бошқа либос кийган, Россияда “Бу хориж-ку”, деди кулиб. У опа мендан 10 ёшда катта, кирар ақли кириб, чиқадигани чиқиб бўлган. Иккимизнинг меъёрларимиз ўртасида катта фарқ бор экан. Бу ҳолатда саҳнага чиқишига мендан ташқари бошқа йигитлар, хусусан, Миркомил Мусаев ҳам қарши бўлди. Масаланинг иккинчи томони ҳам бор. Бу саҳна кўриниши орқали очиқ-сочиқ кийинадиган қиз-аёллар танқид остига олинган. Яъни биз уни ўрнак қилиб кўрсатганимиз йўқ, аксинча Нилуфар опа орқали ана шундай қиз-аёлларнинг юзига кўзгу тутдик. Кейин яна бир масала, биз бундай чиқишни қоралаймизми битта қонунни йўлга қўйиш керак. Яъни ўзбек санъаткорига қўйилаётган тақиқ “Халқлар дўстлиги”да концерт бераётган Филипп Киркоровнинг раққосасига ҳам қўлланиши керак. Чунки томошабин битта, яъни хорижлик санъаткорнинг Тошкентдаги концертига ўзбек мухлиси боради. Бунга мумкин эмас, унга бўлаверади деган қарор адолатли эмас, — дейди Даврон Кабулов.

Суҳбатни тўлиқ ҳолда томоша қилишингиз мумкин.