“Концертолди келишувлар бузилди” — Конста “Халқлар дўстлиги”ни танламагани ва принципларидан воз кечмаслиги ҳақида гапирди (видео)

Ёшлар орасида Конста тахаллуси билан танилган рэпер Шариф Абдуллаев “Дарё”нинг YouTube дига каналига берган интервьюсида “Халқлар дўстлиги” санъат саройида концерт беришни истамаслиги, рэперлар фестивалидан чиқишдан бош тортгани ва ҳеч қачон ўз принципларидан воз кечмаслиги ҳақида гапирди.

— “Халқлар дўстлиги” ҳамма ўрганган, концерт қилса осонроқ бўладиган жой. Реп халқимизга ноодатийроқ, уни тикка туриб тинглаган маъқул. Шу боис, концертимиз орқали “Халқлар дўстлиги”дан ташқари ерларда ҳам концерт бериш мумкинлигини кўрсатишга қарор қилдик. Реп қўшиқларини шунчаки ўтириб тинглаб бўлмайди. Шохруҳ “Халқлар дўстлиги” санъат саройида бўлган концертида ҳам ҳеч ким ўтириб, концертни томоша қилмаган. Ярим соатдан сўнг биринчи-иккинчи қатор тушунчалари аҳамиятсиз бўлиб қолган, — дейди Конста.

Декабрь ойида “Ҳумо” муз саройида ўзбек рэперларининг фестивалида Конста ҳам ижро этиши керак эди. Аммо у ижтимоий тармоқлардаги саҳифаларида концертда иштирок этмаслигини маълум қилди. Аммо шу кунгача бунинг аниқ сабабларини изоҳламаганди.

— Менинг санъаткор сифатида ўз позицияларим бор. Реп фестивали ғоясини эшитиб жуда хурсанд бўлдим, 10 та рэпер “Ҳумо”да иштирок этаётгани қувонишга арзийдиган воқеа. Агар 10 та рэпер “Ҳумо”да куйлайди десак зўр, аммо фалончи, писмодончи ва бошқалар деса яхши эмас. Яъни концертолди келишувлар бузилди, шу боис унда иштирок этишдан бош тортдим. Менимча, ҳар бир ижодкор ўз ҳурматини талаб қилишни билиши керак. Менинг чиқиб кетишим, бошқаларнинг фойдасига оз бўлса-да таъсир қилди, деб ҳисоблайман, — дейди Конста.

Реп устаси Конста ҳаётда ўз принципларига содиқ қолиши ва ҳеч нарса улардан воз кечишига арзимаслиги ҳақида гапирди.

— Агар бир санъаткор бренд деб оладиган бўлсак, у фаолияти йўлга қўйишдан аввал унга нималар мумкинлиги ва мумкин эмаслиги ҳақида аниқ режалаштириб олинади. Аслида ҳамиша ўзига хосликка эътибор бериш керак, бўлмаса бошқалардан фарқ қилмайдиган бўлиб қолади. Шу кунгача ўз принципларим сабаб жуда кўп шартномаларни бекор қилишимга тўғри келган. Аммо бундан ҳеч қачон афсусланмайман. Чунки принципимга содиқ қолиб биттасидан воз кечсам, бундан ҳам яхшироғи келишига ишонаман. Амалиётда ҳам худди шундай бўлган. Ҳалигача машина бошқармайман, оддий уйда яшайман аммо ҳамиша кўнглимда хотиржамлик бор. Ҳатто, битта “Ролтон” еб ўтирганимда ҳам хотиржам бўламан. Чунки менда “Принципларимдан воз кечиб, бўлса бўлди, шуни қилишим керак”, деган фикр йўқ, — дейди Конста.

Суҳбатни тўлиқ ҳолда “Дарё”нинг YouTube даги каналида томоша қилишингиз мумкин.