Ўзбек санъатининг примадоннаси Юлдуз Усмонова ҳар йилги концертини ўзгача шукуҳ ва катта тайёргарлик билан ўтказади. Ундан анча кейин санъатга кириб келган хонандаларнинг кўпчилиги “Энди концерт бермайман”, деб чиқаётган бир вақтда хонанда ҳар йили 14-15 кун жонли ижрода куйлаб, мухлисларини қувонтиради.
Хонанданинг бу йилги концерти ҳам 13 кун ўтказилиши режалаштирилган, аммо талаб бўлса, яна бир-икки сеанс қўшилиши ҳеч гап эмас. Хонанда журналистларни концерт тайёргарлигига таклиф этди ва мухлисларини қизиқтирган кўплаб саволларга жавоб берди.
-mGjXTCVl.jpg)
— Бу йилги концерт рэпертуарида янги қўшиқлар билан бирга 1990 йилдан то 2005 йилгача ижро этилган энг ҳит қўшиқлар ҳам ўрин олган. Ўтган йили ретро концерт ҳам бергандик. Одамлар жуда яхши қабул қилишди, чунки кейинги пайтларда эски қўшиқларга бўлган талаб ниҳоятда юқори. Бу йил концерт бериб, 2-3 йил дам олмоқчиман. Бир оз концертдан танаффус қилиб, эътиборни ижоднинг бошқа томонларига қаратиш ниятим бор. Шу ўринда яна бир гап, “Халқлар дўстлиги” санъат саройида концерт бериш учун жуда катта маблағ тўлаймиз. Аммо шароитлари у қадар яхши эмас. Пулини тўлаяпмизми, шароити ҳам кўзни қувонтириши керак. Зора 2-3 йилдан кейин озгина таъмирлаш ишларини қилиб, олаётган ижара пулларига яраша ижодкорларга шароит қилиб беришса, — дейди Юлдуз Усмонова.
Юлдуз Усмонова концерт харажатлари учун қанча маблағ сарфлайди ва концертлари ўзини оқлайдими?
-HDIPaPno.jpg)
— Жуда катта маблағ сарфланади. Боя шу масалада гаплашганимда иштирокчиларнинг ўзига 100 минг АҚШ долларидан зиёдроқ маблағ “тикиб” қўйилди. Ҳали олдинда саҳна либослари, операторлар жамоаси бор. Катта оркестр билан ишлаяпмиз, улар оз маблағга ишлашмайди. Бу давлат тадбири эмаски, “Сизларга ойлик беряпман, ишлаб берасизлар”, десам. Аммо уларнинг меҳнати олаётган ҳаққига арзийди. Пулим бор экан, беряпман. Агар давлат тадбири бўладиган бўлса, концертни таклифнома билан ҳоким бўлиб ишлаб ўтирган одам келиб кўради. Мен эса оддий қишлоқдаги мухлис ҳам келиб кўроладиган концерт беряпман. Шу билан бирга қўшни республикалардан келадиган тингловчиларнинг ҳам дидини ҳисобга олган ҳолда оркестр билан қўшиқларни айтяпман, — дейди хонанда.
Юлдуз Усмонова бугунги тингловчиларнинг диди ўзгаргани ва хонандалар унга мослашишга ҳаракат қилиши кераклиги ҳақида айтиб ўтди
— Бугунги талаблар бошқача, шунинг учун албатта, тингловчининг дидини ҳисобга олиш керак. Агар ёшларга мажбурлаб бир қўшиқни эшиттирадиган бўлсак, у ўзига қизиғини TikTok’дан топишга интилади. Шунинг учун ижодкорлар ҳам ёшлар билан ҳисоблашиб, улар нимани тинглаб, нимани ёқтираётганини ҳисобини олиши керак. Тўғри, бу жуда майдалашиш дегани эмас. Мен ҳаётнинг паст-баландини кўришни бошлаган 25 ёшдан юқори бўлган тингловчилар учун ижод қиламан.
— Санъат машаққатли иш. Унинг оёғига мих қоқсаму қоқилса, ўрнига ман чиқаман, деган ният билан ижод қилиб бўлмайди. Нафақат санъатда, балки ҳаётда ҳам шундай. Ҳар ким ўз ўрнида юради, мен ҳеч қачон сиз ёки акси бўлолмаймиз. Шу билан бирга карвон мингта бўлса ҳам, ҳеч ким оч ҳам қолмайди. Шунинг учун ёш хонандаларга бағриларингни кенг қилиб санъатга кириб келинглар, ким биландир ўчакишиб қўшиқ айтманглар, дейман, — дейди хонанда.
Агар Юлдуз Усмонованинг концерт дастурига қандай тайёргарлик кўрилаётганини билишга қизиқсангиз, “Дарё”нинг YouTube’даги каналига жойланган махсус репортажни томоша қилинг.
Изоҳ (0)