Noodatiy obrazlar va to‘liq jonli ijro: xonanda Lola 10 yillik tanaffusdan so‘ng “Xalqlar do‘stligi”da konsert berdi (video)

O‘z bag‘riga to‘rt minglab muxlislarni yig‘gan “Xalqlar do‘stligi” san’at saroyida uzoq kutilgan konsert — maftunkor Lolaning 20 yillik ijodiy sarhisobi bo‘lib o‘tdi. Bir necha yillik ijodiy tanaffusdan so‘ng 27-28-29-sentyabr kunlari Lola to‘laqonli jonli ijroda muxlislari bilan kuylab, shou-konsertni ularning e’tiboriga havola qilyapti.

To‘rt qismdan iborat bo‘lgan shouda xonanda eng sara va muxlislarga sevimli qo‘shiqlarini kuyladi. Eng hit taronalarining umuman yangi talqinda ijro etilgani zalda yig‘ilganlarning to‘xtovsiz olqishiga sazovor bo‘ldi.

Sahna dekoratsiyasi va Lolaning imiji alohida mavzu: noodatiylikni xush ko‘ruvchi xonanda bu safar ham astoydil mehnat qilgani yaqqol ko‘rindi. U birinchi qo‘shig‘ini sahnada ot ustida aytgan bo‘lsa, keyingi qismdagi chiqishida esa “gul bargi” ichida kuyladi.

Konsert rejissyorining so‘zlariga ko‘ra, to‘rtta mashhur xonanda bilan duet bo‘lishi kerak edi. Tohir Sodiqov safarga ketgani bois konsertga borolmasligini ma’lum qilgan. Shohruhxon hamda reperlar Konsta va Shahriyor shou boshlanmasidanoq kelib, xonandani qo‘llab-quvvatladi.

 

Shahriyor duetdoshlar orasida birinchilardan bo‘lib sahnaga chiqdi. U jurnalistlarga bergan intervyusida Lolani o‘z opasi kabi hurmat qilishini aytib, ijodiy parvozlar tiladi.

— E’tibor bergan bo‘lsangiz, konsept bo‘yicha konsertda Lolaning eng hit qo‘shiqlari bugun yangi talqinda ijro etiladi. Bugun “Netayin” taronamizni ham shu uslubda tinglashingiz mumkin. Buni to‘laqonli yangi duet deb hisoblamayman, lekin konsert juda ajoyib o‘tishiga aminman.

Reperlarning davri boshlanyapti, bu juda quvonarli hol. Fursatdan foydalanib, Konstaga ham omad tilayman, u juda iste’dodli ijodkor. Eslasangiz, “Netayin”  qo‘shig‘i chiqqanida hali O‘zbekistonda reperlar kam, rep yo‘nalishi ham uncha rivojlanmagan edi. Qo‘shiqda “Baxt, baxt, yana qanday baxt” degan joylari rep bo‘lgandi. Shu sababli ham bugungi konsertda shu qo‘shiqni tanladik.

Lolaning har bir asari ko‘ngilga yaqin, muxlis sifatida “Toshkent, Samarqand” taronasini yaxshi ko‘rib eshitaman, samarqandlik bo‘lganim uchun (kulib). Xudo xohlasa, o‘zim 2025-yil bahorda yakkaxon konsertimni berishni rejalashtiryapman.

“Benom” guruhi a’zolari shou-konsertga bosh musiqiy prodyuser bo‘lib, Lolaning jonli ijrosi ta’minotiga mas’ul bo‘ldi.

— Uzoq yillik tanaffusdan so‘ng konsert mavzusi ko‘tarilganda bizga musiqiy bosh prodyuser bo‘lishni taklif qildi. Mana, bugun jonli ijro ta’minoti, sozandalar bilan ishlash bizning bo‘ynimizda. Lola avval hech kimda bo‘lmagan konsert berishni xohladi. Kerak bo‘lsa, xorijlik mutaxassislarni taklif qilaman, dedi va ko‘rib turganingizdek, konsert rejissyori, dekoratsiya ustasi va baletmeyster chet ellik. Konsert borasida Lola juda talabchan, o‘ziga qo‘yadigan talabi ham shunga yarasha katta.

Jonli ijroda xavf yuqori darajada bo‘ladi, o‘ylamagan ishlaringiz bo‘lib ketishi mumkin. Lola o‘ylanib jonli ijroda qanday bo‘larkan, deb turganida qaytaga muxlislarga yoqadi, mabodo xato ketib qolsa ham, ular buni kechiradi, deb tushuntirdim. Majburlab ko‘ndirdik, yanvar oyidagi Lola bilan bugungi Lolaning yer-u osmonchalik farqi bor — u hozir o‘ziga ishongan, yil boshida esa o‘ziga ishonmagan Lola edi.

Duet qilish rejamizda bor edi, lekin jonli ijroda sahna ortida o‘zim bo‘lishim kerak. Shu sababli duetdan voz kechdik, nasib qilsa, keyingi konsertda birga kuylaymiz. 10 yillik tanaffusdan so‘ng bugun gold collection, ya’ni oltin hitlar — Lolaning eng sevimli taronalari yangicha talqinda kuylanadi.

Reper Konstaning chiqishi butun zalda shovqin ko‘tardi. Muxlislar duetning har bir jumlasini xonandalar bilan baravar kuylashdi.

— Lola bilan duet kuylashni uzoq yillardan beri xohlardim, Instagram’da “Jonim sog‘indim”ni eshitib qolganimda xotiramda yangilandi va shuni remiks qilaman, dedim. Musiqasi juda tez tayyor bo‘ldi va tasavvurimda qo‘shiq deyarli paydo bo‘ldi. O‘zimga qo‘yadigan talabim kuchli, “U haqida”ni yozib bo‘lganimdan so‘ng o‘zimga keyingisi undan-da yaxshiroq chiqishi kerak, bo‘lmasa, ijod qilib nima qilaman dedim, deydi Konsta.

Konsert yakunida Lola qizi va o‘rtancha o‘g‘li bilan birgalikda otasi haqida qo‘shiq kuyladi. “Dadajonim, sizni juda sog‘indim. Tushlarimda sizni ko‘rsam deyman” jumlalari muxlislar ko‘zini yoshga to‘ldirdi. Uning so‘nggi kunlari yonida bo‘lolmagani, karantin sababli O‘zbekistonga kirolmagani haqida, u doim konsertida old o‘rindiqlarda o‘tirib, qizini qo‘llab-quvvatlab turishi haqida eslab, ko‘zlariga yosh oldi. “Sizlarni ham yig‘latganim uchun hammangizdan uzr so‘rayman, azizlarim” dedi Lola uning so‘zlaridan ta’sirlanganlarga qarata.

— Kutmagandim! Men juda xursandman, muxlislar mehrini qalbim bilan, tanamning har bir hujayrasi bilan his qildim. Jamoamga katta rahmat aytaman, ularsiz bu shou bo‘lmasdi. Baxtli bo‘linglar!