“Уларнинг саҳнада қанчалик ҳаяжонланишини фақат мен биламан”. Асал Шодиева янги Шоҳруххон ва концертдаги катта ҳаяжон ҳақида гапириб берди (видео)

Хонанда Шоҳруххоннинг рафиқаси Асал Шодиева “Дарё” мухбири Феруз Муҳаммадга берган интервьюсида турмуш ўртоғининг концерт олди ҳаяжонлари, нимадан асабийлашиши ва янги Шоҳруххонга муносабат билдирди.

Хонанда Шоҳруххон “Эй ёр” деб номланган концерт дастурида ўзининг бутунлай бошқача, янги қирраларини очишга ҳаракат қилди ва янги Шоҳруххон кашф қилиниши ҳақида мухлисларга видео мурожаат қилди.

“Янги Шоҳруххоннинг орзулари жуда ҳам катта, ҳаракати эски Шоҳруххонга қараганда тезроқ”

Янги Шоҳруххоннинг орзулари жуда ҳам катта, ҳаракати эски Шоҳруххонга қараганда тезроқ. Одам улғайгани сари орзуларини седан чиқариб қўяр экан. Ёшлар эса орзуларга тўла бўлади. Менимча, ҳозир Шоҳрух акани ижодларида шунақа вақт келдики, уларда бошқатдан, иккинчи нафас очилиб, янада кўпроқ ва яхшироқ ўзларининг устиларида ишлашни бошлади.

Улар қанчалик саҳнада ҳаяжонланишларини фақат мен биламан. Чунки концертга бир кун қолганида, бир соат, ёки бир дақиқа қолганида уларни қандай ҳаяжон босишини кўриб тураман. Шу пайт уларни қийнаётган ҳаяжонларни ярмини менга берса, уларга енгилроқ бўлармиди, деб ўйлайман. Лекин улар бу сафарги концертни ҳам уддаладилар.

“Бу йил концертда чиқишим режада бор эди, лекин чиқмадим”

Шоҳрух ака идеалист, улар учун ҳамма нарса мукаммал бўлиши керак. Концертнинг нимасидур нотўғри кетиб қолса, жуда қаттиқ асабийлашадилар. Ва албатта бу нарса концертга ўзининг салбий таъсирини кўрсатади. Ҳис-туйғуларсиз, ҳаяжонсиз санъаткор барибир мукаммал эмас. Менимча концертларнинг ҳам қизиқ жойи шунда, концерт кўнгилдан чиқиши учун албатта ҳаяжон бўлиши керак. Қачонки инсон ҳаяжонланса, концерт ҳам шунга яраша кўнгилдагидек яхши чиқади.

Бу йил концертда чиқишим режада бор эди, лекин чиқмадим. Мен концертга чиқмасам ҳам, ўзимни концертга чиққандек ҳис қилиб ўтираман.

Батафсил репортажни қуйида томоша қилишингиз мумкин.