Фарғонада вояга етмаган пиёдани уриб юбориб, унинг ўлимига сабабчи бўлган ҳайдовчига суд ҳукми ўқилди. Бу ҳақда Олий суд матбуот хизмати раҳбари хабар берди.
Қайд этилишича, Фарғона вилояти Фурқат туманида фуқаро Йўлдошев Lacetti транспорт воситасини бошқариб кетаётиб, ўзидан олдинда кетаётган Matiz’ни қувиб ўтиш вақтида вояга етмаган пиёдани уриб юборган. Ҳали мактаб ўқувчиси бўлган бола олган тан жароҳатлари оқибатида вафот этган.
Тўпланган ҳужжатлар Жиноят ишлари бўйича Фурқат тумани судида кўриб чиқилиб, ҳайдовчи Жиноят кодексининг 266-моддасида (транспорт воситалари ҳаракати ёки улардан фойдаланиш хавфсизлиги қоидаларини бузиш) назарда тутилган жиноятни содир этганликда айбдор деб топилди. Унга нисбатан 2 йил муддатга барча турдаги транспорт воситаларини бошқариш ҳуқуқидан маҳрум қилган ҳолда, 5 йил муддатга озодликдан маҳрум этиш жазоси тайинланган.
Яна бир ҳолатда ҳайдовчи Қаюмов Nexia машинасида Учкўприк туманидан Бувайда туманига кетаётганида йўл четида кетаётган велосипед бошқариб кетаётган фуқарони уриб юборган. Жабрланувчи олган тан жароҳатлари оқибатида вафот этган.
Суд ҳукми билан 2 йил муддатга барча турдаги транспорт воситаларини бошқариш ҳуқуқидан маҳрум қилган ҳолда, 5 йил муддатга озодликдан маҳрум этиш жазоси тайинланган.
- Аввалроқ Тошкент шаҳар Яшнобод туманида Captiva уриб юборган пиёда воқеа жойида ҳалок бўлганди.
- Шунингдек, Самарқандда “КамАЗ” аёл ва унинг икки фарзандини уриб юбориши оқибатида болалар воқеа жойида ҳалок бўлгани тўғрисида хабар берилган эди.
Изоҳ (0)