Қозоғистоннинг Жезқазғон шаҳрида машина рулидаги беш яшар бола бир неча кишини уриб юборди. Бу ҳақда Орда.кз хабар берди.
Ҳодиса Grand Palace ресторани яқинида юз берган. Тўхтаб турган машинада ўтирган беш ёшли бола тасодифан қўл тормозини тушириб юборган. Натижада машина ҳаракатланиб, одамларни уриб юборган.
“Йўл транспорт ҳодисаси факти ички ишлар органларида қайд этилган. Тўрт нафар пиёда турли тан жароҳатлари олиб, шифохонага ётқизилган. Тегишли экспертиза тайинланди”, — дея хабар берди Улитау вилояти ИИБ матбуот хизмати.
Соғлиқни сақлаш бошқармаси маълумотларига кўра, жароҳатланганлар сони беш нафар. Уч нафар аёл амбулатор шароитда даволанмоқда. Бир киши тўрт қовурғаси синган ва ички жароҳатлар билан травматология бўлимига ётқизилган. Жабрланганлар орасида бошидан жароҳат олган бола ҳам бор, у касалхонага ётқизилган.
Изоҳ (0)