Покистон ташқи ишлар вазири 11 июнь куни ўз ҳукумати ва жаҳон ҳамжамиятини Исроилга нисбатан қурол-яроғ эмбаргоси жорий этишга чақирган. Бу ҳақда Arab News нашри хабар берди.
Исҳоқ Дар Исроилни қурол-яроғ оқимидан узиб қўйишга чақирган. Бу йўл билан Тель-Авивни ҳарбий кампанияни давом эттиришдан тўхтатиш мумкинлигини маълум қилган.
Покистон расмийси яҳудий давлатини 2023 йил октябридан бери 37 мингдан ортиқ фаластинликни ўлдиргани учун танқид қилган. Исроил можаросини бир неча давлатлар эмас, балки халқаро миқёсда ҳал қилишга чақирган.
Манбада айтилишича, Исҳоқ Дар 11 июнь куни Иордания қироли Абдуллоҳ II, Миср президенти Абдулфаттоҳ ал Сиси ва БМТ Бош котиби Антонио Гутерриш томонидан биргаликда ташкил этилган “Ҳаракатга чақирув: Ғазо учун шошилинч гуманитар жавоб” конференциясида иштирок этиш учун Иорданияга борган. Айнан шу учрашув доирасида қурол-яроғ эмбаргоси масаласини кўтарган.
“Бош вазир ўринбосари ва ташқи ишлар вазири Муҳаммад Исҳоқ Дар сешанба куни Исроилга барча ҳарбий таъминот учун эмбарго қўйиш ва қурол савдосини тақиқлашга чақирди, шунингдек, Ғазо ва Ғарбий Соҳилда фаластинлик тинч аҳолини ҳимоя қилиш учун холис халқаро кучларни жойлаштириш масаласини кўриб чиқишни таклиф қилди”, — дея хабар берган ҳодиса ҳақида Associated Press of Pakistan.
Дар конференцияда, шунингдек, Фаластинда зудлик билан ўт очишни тўхтатишга эришиш ва Исроил аскарларини Фаластин ҳудудларидан олиб чиқиб кетишга чақирган. У жаҳон “қудратлари”ни ўз ролини ўйнашга, Ғарбий Соҳилдаги зўравонликларни тўхтатишга ва Ғазодаги фаластинликларга гуманитар ёрдам кўрсатишни кучайтиришга чақирди.
“Биз Ғазодаги ҳар қандай демографик ёки ҳудудий ўзгаришларга қатъиян қаршимиз. Фаластин давлатини Бирлашган Миллатлар Ташкилотининг тўлиқ аъзоси сифатида зудлик билан қабул қилиниш вақти келди”, — деган Исҳоқ Дар.
Изоҳ (0)