Pokiston armiyasi 11-iyun kuni aksilterror operatsiya o‘tkazib, 11 nafar jangarini yo‘q qildi. Bu haqda Arab News manbasi xabar berdi.
Maxsus operatsiya armiya xavfsizlik kuchlari tomonidan Pokiston shimoli-g‘arbidagi hududda o‘tgan haftada yetti nafar askarning o‘limiga sabab bo‘lgan portlashga javoban amalga oshirilgan. Xavfsizlik kuchlari oldindan to‘plangan maʼlumotlar asosida belgilangan nuqtalarga hujumlar uyushtirgan.
Oldinroq Pokistonning shimoli-g‘arbidagi Lakki Marvat tumanida harbiy yuk mashinasi qo‘lbola portlovchi qurol yordamida portlatilgani xabar qilingan edi. Hujum oqibatida bir nafar armiya kapitani va olti nafar askar halok bo‘lgan.
Bosh vazir Shahboz Sharif 10-iyun kuni Chunian shahrida armiya kapitanining dafn marosimida qatnashgan. U dafn marosimida mamlakatdan terrorizmni yo‘qotishga vaʼda bergan.
“Xavfsizlik kuchlari terrorizm tahdidini mamlakatdan yo‘q qilishga qaror qilgani uchun hududda topilgan boshqa har qanday terrorchini yo‘q qilish uchun dezinfeksiya operatsiyasi olib borilmoqda”, — deyilgan armiya matbuot xizmati bayonotida.
Operatsiya davomida bir qancha terrorchilar boshpanalari ham yo‘q qilingan. Shahboz Sharif o‘z idorasi tomonidan tarqatilgan bayonotda Pokiston xavfsizlik kuchlarini muvaffaqiyatli operatsiya o‘tkazgani uchun olqishlagan.
Operatsiya Pokistonning Afg‘oniston bilan chegaradosh shimoli-g‘arbiy Xayber-Paxtunxva viloyatida olib borilgan. Islomobod hukumatining Kobul bilan aloqalari yomonlashuvi ortidan so‘nggi oylarda ushbu viloyatda terrorizm va zo‘ravonlik to‘lqini kuchaygan. Politsiya, xavfsizlik kuchlari va tinch aholiga bir necha bor hujumlar sodir etilgan.
Izoh (0)