Покистон шимоли-ғарбида 9 июнь куни теракт уюштирилиши оқибатида 7 нафар оддий аскар ва 1 нафар армия капитани ҳалок бўлди. Бу ҳақда Покистон бош вазири идораси тарқатган хабарга асосланиб, Arab News маълум қилди.
Манбада айтилишича, ҳолат Покистоннинг Хайбер-Пахтунхва вилоятидаги Лакки Марват тумани ҳудудида юз берган. Йўлда ҳаракатланиб келаётган ҳарбийлар транспорти номаълум қуролдан нишонга олинган.
Покистон армиясининг бир қатор расмийлари портлаш қўлбола портловчи қурилманинг транспортга улоқтириши оқибатида келиб чиққанини айтган. Ҳодиса жойида портлаган қурилманинг қисмлари топилиб, текширилаётгани айтилган.
Афғонистон билан чегарадош вилоятда сўнгги ойларда зўравонликларнинг янгиланган тўлқини кузатилиши фонида ҳудуддаги Покистон полицияси, хавфсизлик кучлари ва тинч аҳолига бир неча бор ҳужумлар содир этилган. Ҳукумат ҳужумлар ортида “Толибон” томонидан қўллаб-қувватланган гуруҳлар турганини даъво қилган.
“9-куни Лакки Марват туманида хавфсизлик кучлари машинасида қўлбола портловчи қурилма портлади. Натижада капитан Муҳаммад Фароз Илёс ва мамлакатнинг яна яна олти нафар жасур аскарлари ҳалок бўлди”, — дейилган Покистон армияси баёнотида.
Армия теракт уюштирилган вилоятда жангариларни йўқ қилиш учун операция давом этаётганини билдирган. Ҳужум ташкилотчилари ҳеч шубҳасиз жавобгарликка тортилиши хабар қилинган.
Покистон ҳукуматидаги айрим манбалар Афғонистонда фаолият юритувчи “Таҳрики Толибон” гуруҳи ҳужумни зиммасига олиши мумкинлиги ҳақида маълум қилган.
Изоҳ (0)