Исроил кучлари 11 июнь куни Ливан жанубига ҳужум уюштириши оқибатида “Ҳизбуллоҳ” қўмондони ҳалок бўлган. Бу ҳақда Ал-Арабия нашри хабар берди.
Исроил мудофаа кучлари Ливан жанубий чегарасидаги Жоуя аҳоли пунктига зарба берган. Оқибатда “Ҳизбуллоҳ”га алоқадорликда гумонланган 4 киши ҳалок бўлган. Уларнинг бири ташкилот қўмондони бўлгани хабар берилган.
Манбага кўра, Исроил ҳужумида ҳалок бўлган “Ҳизбуллоҳ” қўмондони ҳозирча Исроил билан саккиз ойлик жангларда ҳалок бўлган гуруҳнинг энг юқори мартабали аъзоси ҳисобланади. Тель-Авив ҳужумларида бунгача асосан тинч аҳоли ва оддий ҳарбийлар ҳалок бўлар эди.
“Ҳизбуллоҳ” ўз қўмондони ўлдирилгани ҳақидаги маълумотни тасдиқлаган. Қўмондон жанубий қуролли қисмлар раҳбари Талеб Абдуллоҳ бўлгани айтилган.
“Ҳизбуллоҳ” расмийлари Талеб Абдуллоҳни сўнгги саккиз ой ичида энг кўп зарар кўрган айрим шаҳарларни ўз ичига олган жанубий чегара чизиғи мудофааси учун қўмондон сифатида тайинлаган. Унга Исроил қуруқлик кучларини Ливанга ўтказмаслик мажбурияти юкланган бўлган.
Исроил ҳарбийлари воқеа ҳақида ҳозирча ҳеч қандай изоҳ бермаган. Жоуяга ҳужум борасидаги маълумотни ҳам тасдиқламаган.
Маълумот ўрнида, жорий йилнинг январь ойида Исроил ҳужуми оқибатида “Ҳизбуллоҳ”нинг бошқа бир қўмондони Виссам Тавил ҳам ҳалок бўлган эди. Талеб Абдуллоҳ мартаба ва ҳарбий ваколатлари жиҳатидан Виссам Тавилдан устун тургани айтилган.
Сўнгги саккиз ойда Исроил ҳужумлари оқибатида 300 нафарга яқин “Ҳизбуллоҳ” аскарлари ҳалок бўлган. Улар асосан ҳаво ҳужумлари қурбони бўлган.
Изоҳ (0)