Покистон ҳарбийлари 17 май куни Афғонистон шарқидаги Хост ва Пактика вилоятларига ҳужум уюштирган. Бу ҳақда маҳаллий манбаларга таяниб, Tasnim News нашри хабар берди.
Манбада айтилишича, ҳужумда асосан турар жой иншоотлари нишонга олинган. Бир қанча афғон фуқаролари ҳалок бўлган ва жароҳатланган.
Покистон аскарларининг артиллерия ҳужуми натижасида Пактика вилоятининг Дандпатан шаҳрида масжид вайрон бўлгани хабар қилинган. Шунингдек, ракета ҳужуми оқибатида беш нафар аёл ва бир бола ҳалок бўлган. Жароҳатланган беш нафар фуқаро маҳаллий касалхонага олиб кетилган.
Расмийлар икки мамлакат ўртасидаги рамзий Дуранд чизиғида фаол тўқнашувлар юзага келганини билдирган. Чегарага яқин аҳоли ҳудудларидан қисман фуқароларни эвакуация қилиш бошланган.
Покистон ҳукумати Хост ва Пактикага ҳужумлар борасида изоҳ бермаган. Кобулдаги ҳукумат Покистон ҳарбийларини чегара ҳудудини бузишда айблаган.
Бундан олдин, 2024 йил 18 март куни Покистон ҳарбий-ҳаво кучлари Афғонистоннинг шарқий чегарасидаги икки вилоятга ҳужум уюштирган эди. Разведка маълумотларига таянган Покистон ҳарбийлари муҳим стратегик ҳарбий нуқталарга зарба берган.
Ўша ҳужумда Афғонистон расмийлари беш нафар аёл ва 3 бола ҳалок бўлганини айтган. Покистон бу даъволарни рад этган.
Изоҳ (0)